Ika-29 Nga Kapistahan Ni Sr. San Isidro Labrador Gisaulog

Gisaulog sa Gagmay’ng Kristohang Katilingban (GKK) San Isidro Labrador, Juliville, Tigatto ang ika-29 nga Fiesta niadtong Mayo 18, 2022. Kini inubanan sa tema nga: “San Isidro Labrador magtatabang sa panahon sa kalisdanan ug sumbanan sa pagkamaalagarong piniyalan”.

Si San Isidro Labrador ang patron sa mga magdadaro. Siya usab ang patron sa kapital sa Espanya nga mao ang Madrid. Usa siya sa mga pinakailadong Santo dinhi sa Pilipinas ug dako usab ang ihap sa mga tawong nagdebosyon kaniya. Siya usa ka maayong tawo inubanan sa iyang asawa nga si Maria dela Cabeza.

Ang tema karong tuiga naglarawan kang San Isidro Labrador isip magtatabang sa panahon sa kalisud. Inila si San Isidro Labrador nga usa ka kabus nga kanunay naghatag og tabang sa iyang isigkaingon. Sa iyang kinabuhi, siya nagpabiling matinabangon maskin sa mga gagmay’ng hayop susama sa mga langgam. Si San Isidro Labrador usab nagpabilin nga maisogon ug kanunay nga nagaampo ug nagadangop sa Ginoo sa panahon sa mga kalisdanan sa kinabuhi. Nanghinaut ang mga taga Juliville nga sa tabang sa ilang patron, ila usab mapuy-an ang birtud o hiyas sa pagkamanggihatagon ug pagkamaampoon.

Ang pagkapiniyalan mao ang ikaduhang bahin sa tema sa kapistahan. Tungod sa nagpadayong pagpakaylap sa gitawag nato nga Stewardship, nakita usab sa katilingban nga si San Isidro Labrador usab nahimong sumbanan sa pagkamaalagarong piniyalan. Kini tungod kay siya nahimong maayong magdadaro ug piniyalan ngadto sa iyang agalon nga si Juan de Vargas. Ug tungod niini nahimuot ang Ginoo sa iyaha ug siya gipadalhan og duha ka Anghel nga nitabang kaniya sa iyang pagdaro.

Aron mabulukon ang kapistahan ni San Isidro Labrador, adugay gihimong pagnobena sugod niadtong Mayo 09. Ang pagprusisyon sa Imahe ni San Isidro Labrador gihimo sa bisperas sa kapistahan sa Mayo 17 sa alas 5:00 sa hapon. Gisuroy ang patron sa tibuok subdivision sa Juliville dayon misunod ang nobena sa ikasiyam nga adlaw.

Taliwala sa mga problemang gisagubang sa mga taga Juliville, nagmadasigon gihapon ang tanan uban sa kakugi sa mga GSLs ug suporta sa mga miyembro sa katilingban. Sulod sa niagi ug karong tuig nahuman sa GKK ang mga proyekto sa chapel ceiling, sacristy, altar renovation ug sa kasamtangang panahon padayon ang proyekto sa pagpintura sa gate sa kapilya. Kini tungod sa pagpaningkamot sa mga miyembro sa katilingban ug grasya nga nadawat sa Ginoo.

Gipahigayon ang Santos nga Misa alang sa kapistahan sa Mahal na Patron, Sr. San Isidro Labrador Mayo 18, 2022 sa alas 6:00 ang takna sa buntag sulod sa kapilya diin gipangulohan ni Kura Paroko, Fr. Dionisio Tabiliran. Malaumon ang mga GSLs sa Juliville nga unta magpadayon gihapon nga molambo ang katilingban pinaagi sa pagpatiwala sa Mahal na Patron, Sr. San Isidro Labrador.

Viva Sr. San Isidro Labrador! Malipayong piyesta sa tanan! (Allyza Hope Tabigue, GKK SoCCom)