Kasaulogan Duyog sa mga taga GKK San Jose Beto

Nabatasan na sa mga parokyano sa San Roque Parish-Malabog ang pagbisita sa katilingban sa San Jose-Beto matag saulog sa kapistahan niini ug kini nahitabo na usab niadtong Mayo 3, 2022. Kini timaan lamang sa gugma nga nabati sa matag usa diha sa pagtubag sa ilang tagsa-tagsa ka mga tawag isip mga sumusunod ni Kristo.

Ang Sitio Beto nahimutang sa awaaw kaayo nga lugar, kini nga GKK aduna lamang 21 ka mga miyembro, diin walay ni bisan unsang matang sa sakyanan ang makahimo pagsulod niini. Mahimo lamang nga makaabot ka sa maong lugar pinaagi sa pagbaktas sulod sa usa hangtud duha ka oras. Sa maong paglayag, masinati nimo ang kakutas sanglit bakilid man kaayo ang agianan. Hilabi nga naatlan ang maong higayon sa ulanon kaayo nga panahon. Apan wala kini panumbalinga sa mga mokapin kon kulang usa ka gatos ka mga parokyano, pursigido sila nga makalahutay sa paglakat bitbit ang mga gasa nga ilang itanyag sa mga lumlupyo didto. Sa pag-abot nila, daw nahupay ang ilang gibating kakapoy tungod sila nakakita og susama ka nindot sa palasyo nga dapit, diin adunay mga tao nga abli og mainiton gayud sa pagdawaat og mga bisita. Ug sama sa naandan, human sa misa og pagpamunyag sa upat ka mga bata, gihimo dayon ang pag lingaw-lingaw nga giunhan sa ministriya sa PSB kon Pangulo sa Batan-on. Nga bisan ang ulan wala nakapugong niini, padayon sila sa ilang tinguha og tumong nga mao ang maka sinati sa kinabuhi sa atong mga kaigsuonang Lumad nga sama kanato usa usab ka magtutuo. “Diha sa atong pagsunod sa kabubut-on sa Ginoo sa atong pagpangalagad kita unta sama kang Sr. San Jose nga mopadayon bisan paman sa mga tagsa-tagsa nato ka mga kaugalingon nga hagit inubanan sa atong pagkamainampoon”, mensahe ni Father Arnold Balaquinto, diha sa iyang homiliya. Sa atong pagkinabuhi sa matag adlaw, kanunayng hagit kanato mao ang pagpabilin sa pagkamatinud-anon. Sama kang Sr. San Jose, nagpabilin nga tinuod sa iyang pagpadayag sa iyang dakong gugma kang Santa Maria bisan paman sa mga panghitabo nga lisud kaayong tuohan.

Malipayong namauli ang tanan sa tagsa-tagsa nila ka panimalay, sa ilang pagbaktas anaa ang kahiusa nga makita pinaagi sa pagtinabangay. Ug tungod nasinati gihapon nila ang kalipay luyo sa ulan ug kalisod sa dalan. Kini tungod usab sa presensya sa matag usa ug labaw sa tanan sa kasinatian nga ilang dalahon sa tibuok nila kinabuhi. (Joziel Crodua | Youth SoCCom)