Gaba ba kini?

Dear Ate Emz,

Ang tao kasagaran walay katagbawan. Maangkon ang kagustohan, gusto pang dungagan pinansyal man o material. Mao gayud kini ang kamatooran.

Minyo ako ug dunay usa ka anak. Ang akong sitwasyon kumplikado kaayo. Wala na kami maayong pagsinabtanay sa akong asawa. Taud-taud na nga wala kami nag-ipon sa usa ka balay. Ang kapait pa gyud kay nadungagan ang akong anak apan ngadto sa lain. Suportado ug wala ko man hinoon gitalikdan ang akong mga responsibilidad isip amahan tungod kay duna man akoy kapanguhaan. Kini lang sa umaabot kay akong nahibaw-an nga nagsabak ang akong maingon nga ka relasyon.

Angkunon nako nga mali na ang akong nabuhat ngadto sa akong pagkabulag sa akong pamilya nadungagan pa kini ug usa pa ka salaud. Pait kaayong huna-hunaon nga duna na sab akoy atubangon nga suliran. Gaba na siguro kini nga maingon ta tungod sa akong pagka masinugtanon sa kaugalingon. Unsa may maayo kung buhaton kay basin muabot sa punto nga dili ko kayanon ug maka huna-huna ako ug dili maayo.

Salamat,
Jong-Jong

* * * * * *

Dear Jong-Jong,

Ang kinabuhi sa tawo puno og mga pagpili, mga desisyon. Kung unsa man ang iyang nadangat karon, resulta kini sa iyang mga desisyon.

Subo kaayo pamalandungon nga ang imong mga desisyon nagdala kanimo sa kini nga kahimtang nga imoha ra sab gibuhat sa imong kaugalingon. Murag nagsumpay-sumpay na ang tanang mga panghitabo padulong sa mga kahimtang nga nakahatag nimo og kinabuhing walay kalinaw, busa, bug-at pas-anon. Apan kining tanan dapat imong atubangon.

Una sa tanan, ang usa ka problema dili masulbad pinaagi sa pagsulod sa usa pa ka problema. Hinumdomi nga ang pagpuyo nga walay kasal o adunay relasyon gawas sa kaminyoon, batok gyud kini sa kabubut-on sa atong Ginoo. Mahimo kini nga sinugdanan sa dili malinawon nga kinabuhi. Kanunay ka masamok sa imong konsensya, ug sumala pa nimo, “basin moabot sa punto nga dili ko kayanon ug maka huna-huna ako ug dili maayo”. Kini nga panghunahuna usa sa tentasyon nga gikan sa espiritu sa kangitngit nga moagak nimo aron mawad-an ka og paglaom sa kinabuhi. Kinahanglan mahimo ka nga magbinantayon niini, busa, ayaw gyud padaog ani. Pag-ampo, ug labaw pang pag-ampo, aron mabatokan kini nga tentasyon. Hinumdomi nga ang pag-ampo mao lamang ang atong kusog, matud pa ni San Pedro Poveda.

Ang tawo, sa kinaiyanhon, huyang gyud, apan makaplagan lamang niya ang kusog kon siya dapig sa Ginoo. Sa kasamtangan, usa ka gasa gikan Niya nga nakaamgo ka nga sayop ang imong gibuhat. Nakaila ka sa imong kaugalingong kahuyang ug imong gidawat nga ikaw “masinugtanon sa kaugalingon”. Kining pag-ila ug pagdawat sa sayop mahimong mga inisyal nga lakang padulong sa pagbag-o sa imong dalan. Hinuon, sayon lang isulti apan lisod himuon, apan kinahanglan nga ikaw dunay lig-on nga determinasyon sa pagbag-o sa imong kinabuhi.

Uban sa bug-os nga pagpaubos ug mahinulsulon nga kasingkasing sa pagdawat sa kalapasan, makig-uli ka sa Ginoo pinaagi sa pagpahimulos sa Sakramento sa Pagkumpisal aron makabaton ka sa grasya sa pagpasaylo gikan sa Ginoo ug magsugod ka na sa paglakaw sa hustong dalan. Dili ka Niya pasagdan ug Iyang ibubo kanimo ang gikinahanglan nga mga grasya niining pakigbisog sa pagbag-o sa imong direksyon sa kinabuhi, pagbalik ngadto Kaniya.

Importante nga imong hubaron ang imong mga pag-ampo ngadto sa aksyon, tungod kay kung ang mga pag-ampo dili himuon sa buhat, kini mga walay sulod nga retorika. Atubangon nimo ang imong responsibilidad. Ug sa makausa pa, sayon lang isulti kaysa buhaton, apan siguraduhon nimo nga wala nay live-in o sayop nga mga relasyon tungod kay kini usa ka sala ug supak sa sugo sa atong Ginoo.

Usa sab ka lakang mao ang pagpaningkamot nga makig-uli sa imong asawa (kung kasal kamo sa usag-usa). Walay dili pagsinabtanay nga dili masulbad sa bukas ug walay paghukom nga dayalogo, ug pagpailob ngadto sa pagdawat sa mga kasaypanan, pagpangayo ug paghatag sa pagpasaylo. Kung nanginahanglan kamo og propesyonal nga tabang, mas maayo nga maka avail kamo niini. Uban sa grasya sa Ginoo, walay imposible aron mobalik ang inyong gugma sa usag-usa, kay ang Ginoo GUGMA sab. Alang sa inyong anak ug sa inyong pamilya unta kini maka sentro sa Ginoo, aron bisan unsa nga mga pagsulay, makapalig-on sa relasyon sa tanan.

Hinaot unta nga ang Balaang Espiritu Santo sa kanunay molamdag ug mogiya kanimo sa imong mga desisyon alang sa imong pagbangon sa kinabuhi, gikan sa kangitngit ngadto sa kahayag ni Kristo. Labaw nga mas magmapaubsanon, responsable ka nga amahan ug bana, ug labaw sa tanan mas duol Kaniya samtang magpabilin kang lig-on, matinud-anon ug masinugtanon sa Iyang kabubut-on. Dugang pa niini, hinaot sab nga mahimo kang mas maayong tawo karon kay sa kagahapon.

Have a grace-filled and meaningful Easter season!

God bless you more.
Ate Emz