Kahayag Maangkon Sa Tawong Matuohon

Ikaupat nga Domingo Sa Kwaresma
1 Sam. 16:1, 6-7, 10-13/ Ps. 23:1-6/ Eph. 5:8-14/ Jn. 9:1-41

Usa ka gabii sa kumbento, dunay buta nga masahista. Sanglit ang pari nga magpamasahe nagmisa pa, ug ang kaubang pari nga miatubang niya molakaway na para sa misa sa GKK, nanamilit ang pari sa buta: “biyaan ko una ikaw Brod kay duna pa koy misa, paabuta lang ang kauban kong pari.” Ang buta mitubag, “sige Father, ayaw lang palunga ang TV kay motan-aw ko.” Nagdali sa pakanaug ang pari mitubag, “sige, adto nako.” Ulahi siyang nakaamgo unsaon niya pagtan-aw nga siya buta man?

Ang atong mga pagbasa nagpahimangno nga ang kahayag maangkon sa tawong matuohon. Apan usahay kita, bisan tarung atong mga mata nagpabilin tang buta. Nganu man? Una, anaa kita sa kangitngit kung ang atong gitan-aw sa tawo mao lamang ang iyang hitsura. Kung ang atong sukod sa tawo anaa lamang sa iyang barug ug bistida, mapakyas kita sa pagkakita sa kaayo sa kasing-kasing. Bisan ang Ginoo, diha sa unang pagbasa nagpili sa mga putli nga sa tinuoray nagmatinud-anon diha kaniya ug dili sa hitsura sa tawo.

Ikaduha, magpabilin kita sa kangitngit tungod sa dautang buhat. Kini mahitabo kung dili kita maghimu sa makapahimuot sa Dios. Kung ang ato lamang tumong mao ang pag-uyon niining kalibutan, ang pagbuhat sa gibuhat sa kasagaran ilabi na ang paglikay sa sakripisyo ug pagpili sa kaharuhay, mapakyas kita pagpuyo sa kahayag. Kung buot kita nga magpuyo sa kahayag, kinahanglan andam kitang magsakripisyo aron mahimo nato ang kabubot-on sa Ginoo sama sa nadungog nato sa ikaduhang pagbasa.

Ikatulo, magpabilin kitang buta kung dili kita modawat sa kalipay nga dala sa maayong buhat sa Ginoo. Sama sa gisulti ni Santo Papa Francisco, ang kasinatian sa kaayo sa Ginoo magdala kanato sa kalipay sa ebanghelyo, Evangelii Gaudium. Dinhi pakyas ang mga Hudiyo sa wala pagdawat niining Maayong Balita nga ang Ginoo nag-ayo sa buta gikan sa kangitngit. Nibalibad ang mga Hudiyo sa presensiya sa Manluluwas. Wala nila nakita ang nasinati sa buta nga giayo ni Hesus diha sa ebanghelyo. Ang pamilya lamang sa buta maoy nakadawat sa kaayo sa Dios.

Hinaut unta nga niining Kwaresma maabli ang atong mga mata ug makita ta ang kahayag uban sa pagtoo sa Ebanghelyo.