Gugma: Buhat usab sa mga Tinun-an

Ikalimang Dominggo sa Pagkabanhaw (May 15, 2022)
Acts 14:21-27 / Ps 145:8-9, 10-11, 12-13 / Rev 21:1-5A / Jn 13:31-33A, 34-35

Nadunggan nato ang mga pulong ni Hesus “maghatag ako kaninyo ug bag-ong sugo; paghigugmaay kamo ingon nga Ako nahigugma kaninyo. Paghigugmaay usab kamo. Kon maghigugmaay kamo, mahibalo ang tanan nga kamo Akong mga tinun-an,”

Unsa man ang gugma ni Hesus?

Una sa tanan ang Iyang gugma, tibuok ug hingpit nga pagka masinugtanon nga nag gikan sa Amahan. Misunod Siya sa kabubut-on sa Amahan. Ikaduha ang Iyang gugma matinud-anon. Wala gayud Siya molikay sa pagsunod sa kabubut-on sa Amahan. Wala gayud Siya mosukwahi sa plano sa Iyang Amahan. Hingpit Siyang misunod sa makaluwas nga plano sa Iyang Amahan. Ikatulo: ang Iyang gugma mao ang pag-alagad ug pagluwas. Ang Iyang gugma mao ang pagbuhat sa unsa man ang labing makaayo ug makatabang sa Iyang gimahal. Ang Iyang gugma mao ang pagtubag sa mga panginahanglan sa mga nagbakho sa kalisod nga mga hinigugma. Buot nIyang sapnayon ug sabton ang Iyang gihigugmang mga tawo pinaagi sa pagsakripisyo ug pagluwas kanila.

Mao kini ang matuod nga gugma. Iya kining gipaambit kanato diha sa krus ug sa pagkakaron diha sa mga sakramento ilabi na ang Eukaristiya. Mao usab kana ang matang sa gugma nga Iyang gipaabot nganhi kanato agig tubag sa Iyang gugma nga walay paglubad. Dugang pa, matud pa niya: higugmaa usab ang mga tawong nakigbatok, nagsalikway kanato. Kadtong nangpaka-ulaw, nagyam-id ug naghimo kanatong kataw-anan kay nagtuman kita sa Iyang sugo. Kadtong, nagpa-bug-at kanato ug naghimo sa atong kinabuhi nga miserable. Kadtong nanamastamas, nagbudhi kanato. Tinuod, kon nahigugma kita kang Hesus, mabuhat usab nato ang Iyang nabuhat. Aron sa katapusan makaingon Siya sa matag usa kanato: “Kon maghigugmaay kamo, mahibalo ang tanan nga kamo akong mga tinun-an.”