Kristiyanismo: Kagahapon, Karon, ug sa Kahangturan

“Gifted to Give,” ang sentral nga tema sa pagsaulog sa ika-500 ka tuig sa Kristiyanismo dinhi sa atong nasod. Apan, luyo sa lima ka gatos ka tuig nga atong paglawig ug pagpadayon nga paglawig, niagi kita og dili na maihap nga mga bato, mga panganod, ug mga sirkumstansiya nga usahay nakapahuyang sa misyon sa padayon nga Ebanghelisasyon.

Naay usa ka adlaw, nagsugyot ang akong usa ka higala og usa ka pangutana mahitungod sa importansya sa atong pagsaulog sa 500 ka tuig sa Kristiyanismo, nga nganong kinahanglan pa man daw nato mutoo sa Iyaha, nga sa panahon sa pagsakop sa mga Kastila, daghang kinabuhi ang nakalas ug mga dugo nga mibanaw. Apan, sa akong pagpaminaw kaniya, mas nahibaw-an nako hinoon ang kahalangdon sa pag-abot sa Kristiyanismo dinhi sa atong nasud.

Tungod kay daghan pang sama niya. Daghan pang sama sa akong higala nga wala pa gayud kaila sa Iyaha. Kung atong makita, sama sa atong mga martir nga mga santos – sa atong pagpadayag ug pagdepensa sa atong pagtoo – naa gayud makalas sa atoa, naa gayud mawala sa atoa. Apan, andam kita kay migahin kita sa atong pagsalig ug kay tungod nagatoo kita. Mao kini ang gasa nga andam nilang gihatag para sa kaayohan sa sumusunod nga henerasyon – ug kita mao to.

Apan karon, sa lima ka gatos ka tuig sa Kristiyanismo nga atong gisinati, nagsagubang usab ang atong kalibutan ilabina ang atong nasud og dako nga hagit nga diin giuyog ang atong mga hunahuna ug pagtoo. Maong karon, makapamalandong kita, naa pa ba gihapon ang pagtoo sa kadaghanan? Naa pa ba gihapon si Kristo luyo sa tanang kasamtangan?

Ang tubag – kanunayng naa.

Kanunay Siyang naa sa nagkalahi-lahi nga mga nawong ug mga instrumento nga Iyahang gipadala.

Busa, sa pagsaulog nato sa lima ka gatos ka tuig sa Kristiyanismo, luyo sa mga hagit sa kasamtangan, gihagit usab kita sa pagkatinugyanan. Nga isip mga ginasahan, itugway nato kini sa atong mga kaigsoonang nanginahanglan. Imbes nga mahuyang ta aning kasubo nga ginabati nato tungod sa pandemya, himoon nato kining inspirasyon nga mas makapaambit sa uban – nga mas magamit ang atong mga gasa.

“Gifted to Give.” Gigasahan para magpaambit og gasa sa uban. Apan unsa kini nga mga gasa? Mga igsoon, gihatag sa atong Ginoo ang gasa sa 3 T’s – Time, Talent, and Treasure, kung diin kita ginadahuman nga ipaambit usab kini sa mga 3 L’s natong mga kaigsoonang – Least, Lost, and Last.

Sa pagbuntog sa mga Espanyol diri sa atong nasud niadtong 1521, ato na pud kining buhaton human ang 500 ka tuig. Apan, ang pagbuntog na atong pagabuhaton mao ang pagbuntog sa mga kasubo nga ginabati sa uban, na kita mutabang ug ipailaila si Hesus sa kadtong mga wala pa kaila Niya.

Sumala pa ni Archbishop Romulo Valles, “Pagtoo nga nagasidlak pinaagi sa buhat sa kalooy…” matod niya, kini nga panghunahuna ang pinakalabing maayo nga paagi sa atong pagsaulog. Nga sa atong pagtabang, pagtugyan, ug pagpaminaw sa atong mga kaigsoonan, ginapakita nato si Kristo kanila.

“Unsaon nato pagtubag ang tawag sa paghatag sa kaugalingon.” Mao kana ang angay natong pamalandongan dili lang karon sa atong pagsaulog, kon dili sa tibuok kinabuhi nato nga pagka Kristiyano. Matag usa kanato naay gasa ug matag usa kanato usab nanginahanglan. Matag usa kanato giuhaw ug matag usa kanato naay tubig. Busa atong i-ampo ang giya ug ang pag-uban sa atong Ginoo sa atong pagsuta ug pagpanday og mga maayo nga mga buhat. Nga unta, mahiaguman nato ug magamit sa tama nga paagi ang mga gasa nga anaa ta, nga dili lang kita kutob sa istorya, apan sa lihok usab sa gugma ug kalooy – kay kining tanan atong ipaambit usab sa mga sumusunod nga mga henerasyon, kay kita mga gigasahan para mupaambit og gasa sa ubang nanginahanglan. (Ma. Joneila B. Laruya | Winner Essay Writing GKK Based Category | 19-30yrs. Old)