Arkidyosis sa Davao musalmot sa sa Lokal ug Nasudnong Piniliay

Sa Lunes, Mayo 9 ipahigayon ang pagpili o pagboto sa mga kandidato nga midagan sa lain-laing posisyon sa pangatungdanan sa gobyerno gikan sa Presidente ngadto sa konsehal sa mga lungsod ug munisipyo. Ang piniliay usa ka mahinungdanon ug demokratikong proseso nga gitakda sa atong mga batakang balaod nga naghatag sa katungod (right of suffrage) sa matag lumulupyo sa pagpili sa mga kandidato nga maghatag ug kalamboan, kaayohan ug mag-unong ilabina sa atong mga kaigsuonan nga ana-a sa kaalaot ug kalisod.

San Miguel Parish PPCRV Orientation

Sa atong Arkidayosis, daghang kalihukan na ang gipasiugda alang niining piniliay. Apil niini ang Circle of Discernment ug Voter’s Education nga gipadagan sa mga Parokya ug GKKs. Ana-a usab ang Candidates Forum nga gipadagan sa Archdiocesan Social Action Ministry, diin giimbita ang mga kandidato dinhi sa lungsod sa pagpadayag sa ilang mga plataporma ug pangandoy sa pagpangalagad kon sila mapilian. Ang Davao Association of Catholic Schools (DACS) nagpahigayon usab sa mga voters’ education pinaagi sa mga eskwhelahan nga sakop nila. Pananglitan ang Ateneo de Davao Blue Vote, anaay mga programa sa online (virtual) candidates’ forum, in-school election survey ug city-wide voters’ survey. Sa DXGN Spirit FM nagpasiugda ug mga kulo-kabildo sa kamahinungdanon sa mga prinsipyo sa piniliay ug ang pagboto.

San Pedro Poveda Parish Youth Circles of Discernment

Usa ka dako nga pagpangandam karon mao ang pagsalmot isip boluntaryo sa adlaw sa piniliay. Gidasig ni Arsobispo Romulo Valles ang pag-organisa sa PPCRV sa tanang Parokya diha sa pag-una sa Archdiocesan Social Action Ministry uban sa Davao Association of Catholic Schools. Sa pagsalmot sa mga boluntaryo gikan sa nagkalain-laing hut-ong sa Archdiocese niining tuiga, ana-ay tulo nga importanteng tahas nga gipadayag ni Arsobispo Valles:

• Pagkuha sa Election Return receipt (ER) para sa PPCRV/NAMFREL paghuman sa oras sa pagboto.
• Pagtukod sa mga Voters’ Assistance Desks (VAD/VAC) sa tanang mga eskwelahan asa pagabuhaton ang pagboto (Voting Centers/Polling Places).
• Pagpadala og mga ronda (roving teams) nga mag-obserbar o maniid sa mga hitabo (incidents) sa adlaw sa piniliay.

St. John Paul II Parish PPCRV Volunteers Orientation

Tungod sa kakulangaon sa mga boluntaryo ug daghan sa mga boluntaryo mga batan-on man, dili pagabuhaton ang pollwatching (o pagbantay sa mga presinto). Ang magboluntaryo karong tuiga kinahanglan 18 ang edad ug pataas. Ang magboluntaryo karon kinahanglan moagi sa mga Parokya diha sa ilang parish social ministry, ug mag-alagad sa eskwelahan nga duol sa ilang balay. Apan ang uban nga interesado pwede usab magboluntaryo sa DACS o mga sakop nga private schools sama sa Holy Cross, Assumption College, San Pedro, University of Immaculate Concepcion, ug Ateneo.

San Isidro Labrador Parish Lumondao Youth Circle of Discernment

Ang pagsalmot sa umaabot nga piniliay usa ka timailhan o paghubad sa atong Kristohanong kinaiya nga gidasig karon sa atong Simbahan. Una ang matugyanon, matinud-anon ug maabi-abihong pag-alagad (stewardship) ug paligpanaw ug pag-uban isip simbahan alang sa kaayohan sa kadaghanan (synodality). Kining mga kalihukan sa pagsalmot sa eleksyon mao ang usa ka bahin sa paghubad sa atong misyon sa bag-ong ebanghelisasyon (new ebangelization) nga gipadala kitang mga magsasangyaw pinaagi sa maayong buhat nga ipatigbabaw ang kaayuhan sa dakong katilingban (common good) pinaagi sa pagtabang sa atong kaigsuonan sa pagpili sa mga lideres nga mga maghatag ug kauswagan, kalamboan ug kaayuhan.

Busa among pasalamatan ang tanang Kristiyano, nga miboluntaryo alang karong eleksyon. Ipakita nato ang atong pakiglambigit diha sa pagtabang sa Parish Pastoral Council for Responsble Voting (PPCRV) ug National Movement for Free Elections) NAMFREL. (Fr. Kim Lachica, SJ)