Pagsaulog sa Pista sa Diyosnong Kaluoy

Sa alas tres sa hapon, nagsugod ang misa pasalamat alang sa kapistahan sa Diyosnong Kalooy sa parokya sa San Antonio de Padua, Agdao niadtong Dominggo, Abril 24. Maabtikon kaayong gibantayan sa halangdong arsobispo, Most Rev. Romulo G. Valles ang oras ug kini mihatag sa sinyales aron sa pagsugod sa processional sa maong takna. Kining orasa makahuloganon gayod sa mga deboto tungod kini man ang takna sa ilang regular nga paghalad sa pag-ampo ngadto sa Hari sa Diyosnong Kalooy.

Sayong nangabot ang pipila ka mga deboto sa simbahan bisan aduna pay usa ka misa una ang misa pasalamat nga ilang gipaabot ug hinay-hinay nga napuno ang dakong luna sa kolor dalag nga maoy sinina sa mga deboto. Ug sa ilang pagpaabot, dako ang ilang antisipasyon sa pag apil niining dakong kasaulogan sanglit duha ka tuig sab nga wala kini mapahitabo.

Ang kasamtangang Spiritual Director sa devotees mao si Rev. Fr. Amado Arroyo nga mao usab ang kura sa parokya dinhi gipatigayon ang maong misa pasalamat. Malipayon si Fr. Madz tungod kini ang kinaunhang higayon nga maka misa ang arsobispo sa Dabaw sa ilang parokya atol niining piyesta.

Sa pagpaabot sa mga deboto nga mahuman ang unang misa, daghan ang nagbarog sa entrada sa simbahan ug makita gayod ang nagkalain-laing estado sa kinabuhi nga adunay hiniusang pagtoo. Usa na diri ang volunteer pianist devotee nga si Mr. Emil Sitjar nga gikan sa parokya sa Ascension of the Lord, Matina. Siya nagpadayon sa iyang apostolado sa pag halad sa iyang talento sa musika ngadto sa simbahan inubanan sa hangyo sa iyang mama nga si Mrs. Emilia Sitjar diha sa ilang paka deboto sa Diyosnong Kalooy.

Sa pagpamatuod, dili tanan adunay hangyo o pinangayo, ang uban, sama ni Mr. Nelson Akusar nga bag-ohay lang kaayo nahimong deboto tungod sa iyang pangidaron nga kwarentay-dos, karon pa siya makahimamat sa Ginoo pinaagi sa iyang titulo sa Diyosnong Kalooy.

Ang baynte ka tuig na sab nga deboto nga dili lang kuno magpaila, mipaambit nga tungod sa iyang kalipay nga gi-ayo siya sa Ginoo, nagpatukod gyod ug usa ka shrine nga ginganlan ug Walk of Mercy sa Brgy. Tinolang Banud sa Toril.

Ma dako o gamay nga milagro, dakong grasya ang gasa sa pagtoo diha sa kalooy sa Ginoo nga maoy naghatag sa tanan diha sa paglaom nga mapasaylo sa mga sala ug mauban Kaniya sa gingharian sa langit.