Simple nga selebrasyon sa Anibersaryo sa Parokya

Ang St. James the Apostle Parish Bunawan nagselebrar sa ika-60 nga anibersaryo sa pagkatukod sa maong simbahan niadtong Abril 25, 2022 (Lunes). Gisaulog kini pinaagi sa misa sa alas 6 sa buntag nga gipanguluhan sa kura paroko nga si Rev. Fr. Rolando O. Mandreza, DCD ug gitambungan sa mga parokyano. Gipamulong sa kura paroko niadtong adlawa ang kasaysayan sa Parokya sa Bunawan. Niadtong Abril 25 tuig 1962, gilagdaan sa obispo sa Prelatura sa Davao, Clovis Thibault PME, ang dekreto sa pagmugna ug pagtukod sa Parokya sa Bunawan nga ginganla’g St. James the Apostle Parish ug gi destino si Reberendo Padre Carol Bernard, PME isip unang kura paroko sa maong parokya.

Ang kura paroko nga si Rev. Fr. Rolando O. Mandreza, DCD nga mihatag sa iyang homiliya.

Atol sa homiliya ni Rev. Fr. Rolando O. Mandreza, DCD, daghan ug rason sa pagpasalamat niadtong adlawa tungod kay pista usab kadto ni San Markos Ebanghelista, ika-60 nga anibersaryo sa Parokya ug nagpadayon kita sa pagsaulog sa Easter Season. Dugang pa niini, siya miingon nga “puno sa kalipay nga maghinumdum sa mga taong nangahimong kabahain sa kalambuan sa Parokya sama sa mga donors sa maong luna ug sa mga nahimong pangulo sa katilingban. Kini tungod kay bisan nakasinati sila ug pagsulay apan milahutay ug nagpadayon sa pagpaningkamot aron mulambo ang maong parokya.” Angay lamang nga pasalamatan ug i-ampo ang tanang nahimong kabahin sa Parokya.

Atol sa kapistahan ni San Markos Ebanghelista, gipadayag sa kura paroko nga ang Maayong Balita sa pagkabanhaw ni Hesus maoy kinauyukan sa Ebanghelyo ni San Markos. Ug usab ang pagbasa nga gikuha gikan sa unang sulat ni San Pedro naghatag ug perspektibo unsaon pagpadayon sa lawig isip Kristiyanos. Nagpasidaan kanato ang maong pagbasa sa kamatuoran nga ang Kristiyano nga kinabuhi dili garantiya nga walay pagsulay maong kinahanglan nga magtukaw o magbantay. Gi-awhag usab sa kura paroko ang mga parokyano nga mulahutay sa pag-alagad sa simbahan, mag-ampo sa matag-usa, mabuhi sa panaghiusa ug makigtambayayong nga naay kahiusahan aron magpadayon ang paglambo sa simbahan. Busa, ang ika-60 ka tuig sa parokya nagpakita lamang sa bunga sa pagtoo sa katilingban nga sakop ni Sr. Santiago. (An-Jean V. Naraga-Moneba / SJAP SocCom)