Duyog sa Akong Sista, Ako Mangalagad

Dear Ate Emz,

Salamat sa kini nga oportunidad sa pagpaambit sa akong kasinatian. Upat ka tuig na kong nga gina dialysis, ug pito ka tuig nga panerbisyo sa simbahan.

Kini ikumpara sa uban, mubo lang nga panahon. Human mawad-an og anak ug asawa, nagsugod ako isip gitarista, uban ang akong igsoon. Siya ang singer sa mga prayer rallies ug Charismatic prayer meetings.

Apan bisan pa man nga nagsugod na ako, aduna gihapoy mga panahon nga muduyog-dili ang nahitabo. One time, naglami mi og inom imbes nga magpractice sa misa, unya sa dihang padulong nako sa parokya gikastigo ko sa Ginoo. Nakabangga ko og sakyanan. Apan, bisan pa man, gimilagrohan gihapon ko sa Ginoo. Na-admit ang asawa ug anak sa akong nabanggaan. Busa, pirti nakong ampo.

Miingon lang ko sa bana nga timing pung buotan, “Sige lang, i-shoulder lang nako na.” After 3 days, nangutana ko sa hospital bill, natingala ko kay Php8,000 ra ang sa asawa n’ya ug sa 1 week observation sa anak, Php10,000 lang.

Natingala jud ko kay private hospital man kadto. Pirti nakong lipaya. Ang bana pa g’yud ang ni-offer nga car insurance na lang niya ang gamiton. Nasayod ko gilabtikan lang g’yud ko sa Ginoo.

Nagsugod ang dialysis nako tong 2014 tungod sa kidney failure. Nakapangutana ko, “Lord, nganong imo man kong gi-ing ani?”

Badlungon man gud ko, busa, nagpromise ko sa iya nga di lang sa ko kuhaon. Pagpangandamon lang usa. Basi naa pa koy sala nga wala nako makumpisal. Karon kung duyog, duyog na jud. Ang ubang butang, material ra, wala nay nada. Maningkamut ko nga mabag-o na ang akong kinabuhi. Ubani lang ko, Ginoo.

Pebrero 2017. Nag premonition nako, nakit-an na nako ang akong wife. Nakaputi. Near-death experience na to. Apan, gilugwayan pa ang akong kinabuhi.

March 2018. Dinagku na nga organs ang naapektuhan. Di na tingali ko maulian. Prayer ra jud – Rosary ug pag kaadlawon, Divine Mercy Chaplet. Mangatol man gud ang akong lawas maong makamata ko sa alas tres sa kadlawon.

“Lord, kung mamatay ko dad-on nako akong gitara. Himua kong gitarista diha. Tanan sukwahi akong tanggalon. Gusto pa ko muduyog sa imong kapilya.”

Two weeks ko way kaon, unya nakagawas rako. Nagpractice na mi. Apan, naluya na ko, a day before the GKK Mass. Wala ko nakatulog. Naguol ko sa choir. Alas 5 pa sa buntag, sakay sa wheelchair, nagpahatud nako sa kapilya. Apan, salamat sa Ginoo, wala jud koy dautang gibati, 20 minutes ang gospel, nakatindog pa ko.

Gilugwayan ang akong kinabuhi aron makaserve pa ko sa akong purpose. Ang akong pag-ampo: mapasaylo sa tanang sala, mahalad ang kaugalingon, mahalad ang akong sakit, makapasalamat, ug makahatag ani nga mensahe: Dili diay angay manluod sa Ginoo. Kung dili tungod niini nga sakit, di ko maduol sa iyaha.

Nagpapasalamat,
Raul

* * * * * *

Dear Raul,

Una sa tanan, atong ipanalangin, hinaut unta walay katapusang kapahulayan ihatag ngadto sa imong asawa ug anak, ug makapahulay sila sa kalinaw ngadto sa Kaharian sa atong Ginoong Makakagahum.

Daygon ug pasalamatan ang atong Ginoo sa paghatag kanimo og gasa sa KINABUHI, human sa daghang mga pagsulay ug mga kalisdanan nga imong naagihan! Mao kini nga usahay makasulti kita nga “kung mag-uwan, mobubu gyud”, tungod sa sunod-sunod nga mga pagsulay ang modagsa diha kanimo. Apan sa taliwala niini, sa imong mga kasinatian, wala gyud ka gipasagdan sa Ginoo. Gani, padayon pa gyud ka sa pagserbisyo isip gitarista bisan pa pila na ka tuig ang imong pagdialysis.

Matud pa sa Portuguese nga panultihon, usahay daw ang Ginoo mosulat og tul-id pinaagi sa hiwi nga mga linya. Sa pagtan-aw balik sa imong mga kasinatian, pagkawala sa imong mga mahal sa kinabuhi, aksidente, dialysis, pagka gitarista, etc., dili malikayan nga makapangutana gyud ka sa Ginoo, “ngano imo man ko giing-ani, Lord?” Usa sab kini ka pagpanghupay sa desperasyon, apan ikaw na mismo ang nakaamgo sa Iyang mensahe nga “gilabtikan lang gyud ka Niya”, ug tingali, kauban sab niini ang pangutana Niya kanimo, “Hey, Bro. Raul, unsay ginabuhat nimo…ngano man nag-ing-ani ka, mo-inom imbes magpraktis para sa Misa?” Ikaw ra gihapon ang makatubag kung ngano nasinati nimo ang mga kasakit nga resulta sa imong gipili nga buhaton kadtong higayon. Ug ang dalan sa pagbag-o nanukad gikan dinhi nga panghitabo, hinungdan nga napaduol na gyud ka sa Ginoo.

Matud pa sa usa ka pari, sa iyahang homiliya, “ang mga kalipay nga atong masinati, mga hunghong kini sa Ginoo, ug ang mga kasakit maoy Iyang mga singgit… mga pagpahinumdum sa Iyang presensiya. Sa mga kasakit nga imong nasinati, sama sa imong naamgo, gihangyo pa nimo sa Iyaha nga lugwayan pa ang imong kinabuhi ug hatagan ka pa og higayon sa pagbag-o, makapangandam pa, kung buot ka na Niya kuhaon. Abi nimo, pinangga gyud ka sa Ginoo kay gidungog ang imong mga paghangyo…bisan pa tinuod nga sa kasamtangan nagpadayon ang imong dialysis, ug naka wheelchair ka na. Makaingon kita nga nakasinati gyud ka og igong mga kasakit ug pag-antos. Apan kung kining tanan gidawat og puno sa gugma Kaniya ug alang Kaniya, mamahimo kining mahinungdanon ug bililhon, busa, walay mausik nga mga merito niini! Mao na kini ang imong dalan sa krus, dalan balik sa Ginoo.

Atong hinumduman nga dili gyud kita makalahutay sa atong mga sakripisyo kung wala kini kaakibat nga gugma. Busa, inubanan sa gugma, ihalad lang ang tanang sakripisyo nganha Kaniya alang sa kapasayloan sa mga sala sa tanang katawhan, sa kaluwasan sa mga kalag sa purgatoryo ug sa uban pang mga intentions sa atong Santo Papa ug sa Simbahan, ug sa atong personal nga mga intentions.

Ang mga pag-antos, makasantos, matud pa usa ka panultihon. Remember, God will shower you with enough graces to persevere and to carry on with life. These may come in raindrops or in sunshine, in tears or in joys, but they are blessings just the same.

Padayon lang sa imong kinabuhing puno sa pag-ampo, paghalad sa kaugalingon, pagdayeg, pag mapasalamaton, pagserbisyo sa katawhan ug sa Simbahan. May all these bring you much closer to God, as you let your life be a continuous joyful song for Him, till you finally join His angels and saints when He calls you in His own time.

May Jesus Christ, our Risen Lord, bless you more.
Ate Emz