Msgr. Bonifacio Burlaza, deboto ni Birhen Maria

Tuig 2020, panahon sa prosesyon sa alas dose sa udto diha sa parokya sa Sta. Ana, nahibulong ako sa usa ka pari nga bisan sa iyang katigulangon, ug hinay na kaayong paglihok padayon gihapon siyang miserbisyo ug migahin sa iyang panahon isip alagad sa simbahan. Gani makita nako nga kanunay siyang magdala ug usa ka botelyang tubig tungod kay siya uhawon human sa iyang paghatag og pamalandong.

Niadtong Marso 29, nakita ko ang iyang larawan kauban sa pagpahibalo nga siya mipanaw na. Wala ko mahibalo sa iyang ngalan, ug subli ko sa akong kaugalingon pamilyar ang iyang dagway. Misantop sa akong huna-huna ang mga pulong sa pag-ampo nga Maghimaya ka Maria, ug didto nahinumdoman ko na siya.

Una matapos ang matag misa siya muhalad gayod og panalangin ngadto sa inahan ni Jesus isip pagpataliwala ug pagtahod. Gani daw masuko siya kung hinay ang tubag sa katawhan ug iyang usbon ang panalangin. Murag strikto kaayo apan nabati ko ang iyang gugma ug pasalamat sa paghalad sa Birhen sa iyang kaugalingon nga naghimo sa katumanan sa plano sa Amahan.

Sumala pa ni San Maximilian Kolbe dili kuno kita mabalaka sa sobrang paghigugma kang Birhen Maria tungod dili kita makatupong sa paghigugma ni Jesus kaniya.

Wala ko man personal nga mailhi si Msgr. Bonie apan nagpabilin kanako ang iyang pagka-deboto sa atong mahal nga inahan. Walay daghang katekismo, walay daghang pahibalo, apan sa iyang pag-ampo sa matag misa ngadto kang Maria, kini nagpakita lamang ug tinuoray nga debosyon isip mapasalamatong anak nga giluwas sa sala ug ang pagkamalaumon nga ang iyang mga panalangin dunggon tungod kay nahibalo siya nga dili maka dili si Jesus kang Birhen Maria. (CMAC)