Pagdawat sa Sakramento sa Eukaristiya

Ang pagpangalawat usa ka bililhong sakramento nga simbolo sa atong pagdawat kon pag “oo” kang Kristo. Busa angayan lamang nga sa atong pagkinabuhi, atong paningkamotan ang paglikay sa pagpakasala aron mahimuot kanato si Kristo, kinsa atong gikalawat diha sa atong pagsimba. Kini ang hulagway sa nagmalampuson nga pagdawat sa mga kabataan sa sakramento sa First Communion nga nahitabo sa GKK San Vicente-Crossing niadtong Marso 5 ug sa GKK Sto. Niño – Balinanao niadtong Marso 27, 2022, nga sakop sa Parokya sa San Roque, Malabog.

Human nadawat sa 39 ka mga bata ang sakramento sa Eukaristiya niadtong Marso 5 sa GKK San Vicente-Crossing, laing 24 ka mga kabataan nasab ang malampusong nakadawat sa susamang sakramento kon diin sila naggikan sa mga GKK sa Sona 2 – Sto. Rosario- Balinsuag, Sto. Niño- Balinanao, San Vicente- Balinano og San Jose- Ipil.

Ang duha ka selebrasyon gipangulohan ni Fr. Arnold Balaquinto, Kura Paroko sa San Roque Parish, kinsa mapasalamaton og mibilib gayod sa mga Pangulo sa Pagpanudlo (PSP) tungod sa ilang pag paningkamot nga maoy hinungdan sa kahapsay sa dagan sa pagpatigayon sa sakramento. Hangyo usab ni Fr. Arnold sa mga ginikanan sa mga first communicant, nga unta sila kanunay magdasig og magsuporta sa mga bata sa pag-apil sa mga Kasaulogan sa Pulong og Pag-ampo sa Santos nga Rosaryo.

Sumala pa ni Sis. Jocelyn Lecera, Zone 2- PSP coordinator, “salamat kaayo sa mga ginikanan nga kanunay nagsuporta gikan paman sa mga pagbansay nga among gihimo.”. Dili gayod lalim ang pagmugna ug mga kalihukan labi pa karon nga bisan Level 1 na kita sa pandemya, anaa gihapoy mga gikinahanglang sigurohon depende sa safety protocols.

“Dili masukod ang akong kalipay human nadawat sa akong anak ang Sakramento sa Eukaristiya”, pagpadayag ni Lizeil Crodua, ginikanan sa usa ka first communicant.

Hinaot nga madasig pagbalik ang mga katawhan sa pag apil sa mga kalihokan sa GKK ug sa parokya pinaagi niining mga bata nga bag-ong nakadawat sa balaanong lawas ug dugo ni Kristo.

Sa Kanunay, Dalaygon, ang Dios! (Jozeil Serondo | Youth SoCCom Comapas Crodua | SRP Malabog)