27th Fiesta Celebration sa GKK San Jose Purok 1 Bunawan

Sulod sa duha ka tuig nga pandemya nagsugod na gayod sa pagbalik sa malipayong pagsaulog sa mga kapistahan ang simbahang Katoliko sa dakbayan sa Dabaw ug usa na niini ang GKK San Jose sa Sunrise Millenium Purok 1, Bunawan. Ang GKK nagsaulog sa ilang ika -27 nga fiesta niadtong Marso 19, 2022 nga gipangulohan ni Reberendo Padre Rolando Mandreza, kura paroko sa parokya sa Santiago Apostol. Malipayong gisugdan ni Padre ang iyang pamalandong tungod kay ubay-ubay ang mga nanimba ug labi pa nga gitugot na ang pagsalmot sa mga kabataan nga nahimong atraksyon tungod sa ilang maanindot nga mga tingog isip choir. Labing mapasalamaton siya sa Ginoo nga nagkatigom ang tanan sa pagsaulog sa kapistahan ni San Jose, bana ni Maria.

Tuod man nga kita anaa sa panahon sa kwaresma apan kita nakabati diha sa kadiyot nga kalipay ug pagmaya duyog ni San Jose ama-ama ni Jesus. Ug sa atong pagpadayon sa kwaresma, wala kita malayo sa atong tumong bisan man kita nagsaulog niining kapistahan; tungod kay ang atong mga pagsakripisyo, pagpuasa, paghinulsol ug paghatag ug limos magdala kanato sa pagka matarong o matarong nga kinabuhi. Ug diha sa atong paghatag ug atensyon diha ni San Jose, kita gipahinumdoman nga siya usa ka ehemplo sa matarong nga kinabuhi.

Sa atong balaang kasulatan, gamay lamang ang mga pulong bahin kaniya apan sigurado kita nga siya usa ka tawong matarong ug tungod niana, kita usab nga mga sumusunod sa iyang anak, milaom nga pinaagi sa iyang mga pag-ampo kita usab anaa sa kinabuhing matarong. (CMAC)