Sr. San Vicente Ferrer, inspirasyon sa pagsangyaw ug pag-alagad

“Magtotoong piniyalan ginasahan sa pagpadayon sa misyon sa pagsangyaw sa maayong balita, taliwala sa tanang pagsulay, inubanan sa panabang ug giya ni Sr. San Vicente Ferrer”. Mao kini ang tema sa ika-65 ka tuig nga pagsaulog sa kapistahan ni Sr. San Vicente Ferrer, Balite, Buhangin sa Zone 7 nga nahisakop sa Parokya sa St. Mary of the Perpetual Rosary Parish.

Wala nahimong babag ang pandemya ug uban pang krisis sa panahon sa pagsaulog sa kapistahan sa Gagmay’ng Kristohanong Katilingban (GKK) sa Sr. San Vicente Ferrer, Balite. Hinoon gihimo kini nga inspirasyon aron sa pagpadayon sa pagsangyaw sa maayong balita. Ang pandemya ug uban pang krisis pipila lamang ka sukdanan kung asa kutob ang atong hugot nga pagtoo sa atong Ginoong Hesukristo. Ang pandemya nga atong nasinati karon usa ka pahinumdom kanatong tanan nga adunay Ginoo nga andam motabang nga dili kita angay magool, hinoon kinahanglan nga magmalig-on batok sa bisan unsang unos nga moabot sa atong kinabuhi ug hugtan pa ang atong pagtoo Kaniya , kay anaa lamang Siya sa kanunay.

Sama sa naandan, ang GKK Sr. San Vicente Ferrer, Balite nagpahigayon og siyam ka adlaw nga pag novena, gisundan sa hiniusang pag-ampo (H.P). Sa katapusang adlaw sa novena gipahigayon ang prusisyon sa imahe ni Sr. San Vicente Ferrer sa alas 4:00 sa kaadlawon palibot sa katilingban. Ang Santos nga Misa gipahigayon sa kapilya niadtong Abril 25, 2022 sa alas 6:00 ang takna sa buntag diin gipangulohan ni Kura Paroko, Fr. Dionisio Tabiliran. Wala mag pahigayon og mga kalingawan ang katilingban agi’g pagsunod sa health and safety protocols.

Sama sa mga hiyas ni Sr. San Vicente Ferrer nga andam sa pag-alagad taliwala sa kalisod ug pagsulay nga naagian ug andam sa pagdawat sa kasugoan sa Ginoo: unta mamahimo kitang maayong ehemplo alang sa tanan nga sama sa atong mahal nga patron, Sr. San Vicente Ferrer, andam sa pag-alagad sa atong Ginoo, sa walay pagduhaduha ug kinasingkasing nga dawaton ang pag-alagad alang sa kaayuhan sa tanan.

Mapasalamaton ang mga GKK Servant Leaders (GSLs) ug mga Miembro nga niabot og 65 ka tuig nga kapistahan ang maong patron, luyo sa tanang kalisod nga naagian sa mga nagdumala o namuno sa mga nahaunang katuigan hanghod karon. Tinood nga sila mga ginasahan o piniyalan aron pagsangyaw sa maayong balita nga giniyahan ni Sr. San Vicente Ferrer. (Michelle dela Cruz, GKK SoCCom)