Misa Sa Krisma Sa Huwebes Santo

Duha ka tuig ang milabay una nasaksihan pag-usab ang misa sa Krisma sa Arkidayosis sa Dabaw ug kasagaran nga ginasaulog sulod sa semana santa panahon sa Huwebes Santo. Atol niining pagbendita sa mga espesyal ug balaan nga mga lana, kini renewal sab sa mga saad isip alagad sa simbahan. Adunay 121 ka mga kaparian ug 3 ka obispo nga mipadayag pagbalik sa ilang mga panaad atubangan sa halangdon nga arsobispo, Most Reverend Romulo G. Valles.

Puno sa mga katawhan nga mga relihiyoso ug mga layco ang simbahan sa San Pedro Cathedral bisan wala pa mag sugod ang misa. Ug gikan pa adtong Dominggo sa Lukay, gihugtan na ang seguridad sa palibot ug daghan sab ang mga kapulisan sa sulod ug gawas sa simbahan hangtod sa misunod nga Dominggo. Sumala pa sa Deputy Station Commander sa San Pedro Police Station nga mao si Police Lt. Ruel Dionela, gitagana sa stasyon ang 27 ka mga police personnel ug 7 ka auxiliary aron magbantay sa seguridad labaw pa nga gilaoman nga mudagsa ang katawhan gikan Huwebes Santo hangtod sa Dominggo sa Pagkabanhaw. Kining seguredad lukop sa upat ka simbahan nga sakop sa maong stasyson.

Dili lamang mga kaparian ang nagpakita sa ilang ka hangop ining panahon sa bindita sa Krisma apan apil sab ang pipila ka congregasyon sa mga kamadrehan. Ang TDM o Teresian Daughters of Mary usa sa mga pinaka sayo nga miabot sa simbahan kung diin anaa sa 25 ka mga madre apil ang ilang postulants ug aspirants ang mitambong.

Napalibutan sa mga excited nga mga volunteers ang simbahan ug sa likod giplastar ang mga vestments diin makita ang mga mother butlers nga nangulo sa pagtabang sa pagpagsul-ob sa maong mga sanina. Sa atubangang bahin usab makita ang duha ka myembro sa knights of Davao Council nga nagpractice sa ilang pag lihok isip honor guards sa panahon sa processional. Sa sulod usab nangandam ang mga hamtong nga gift bearers nga wala na kuno magkinahanglan sa daghang preparasyon sanglit nahibalo ug memoryado na nila ang ilang mga kinahanglang buhaton.

Sa naandan na, gipahigayon ang pagbendita sa mga balaang lana nga pagagamiton sa sakramento sa bunyag, santalana ug mga sakramento sa orden. Ang mga offerers nagmalipayon ug nagmapasalamaton usab nga sila napilian sa simbahan sa paghalad ug paghatod sa mga lana sa altar. Ang first timers nga sila Mr. and Mrs. Garcia, kung diin si Sir Eliezer, PSL sa GKK San Juan Bucana, ug special lay minister of the Holy Eucharist nga isend forth karong adlawa Abril 24 maoy nag dala sa balsam. Si Mr. Allan Farnaza Regional Director sa DepEd Region XI duyog ni Ms. Ma. Ines Asuncion Assistant Regional Director ang nag halad sa oil for holy chrism. Ug ang mag asawang doctor nga sila Dr. Tommy ug Dra. Ameleen Bangayan ang naghalad sa oil for the sick. Ang bagong City Director sa Davao City Police nga si Police Col. Alberto P. Lupaz uban sa iyang staff mao ang naghalad sa oil of catechumens.

Nagmalipayon ang mga kaparian nga religious ug archdiocesan tungod sila nagkitaay na pag-usab ug nagkahimamatay panahon sa ilang pagkaon una ang misa. Sanglit wala sila naka pahigayon ug group picture, lipay gihapon ang ilang gibati sumala pa ni Fr. Junar dela Victoria. Dungag niya anaa ang kahinangop tungod sa duha ka tuig wala sila maka saulog niining Misa sa Krisma. Sa ilang pagpanaad saksi ug kabahin dili lang ang arsobispo apan ang mga katawhan sa tibuok simbahan.