Kalipay sa Pagkabanhaw

Dili matukib ang kalipay sa 55 ka mga tigulang, masakiton ug apil sab ang mga buang nga nakadawat sa pahalipay nga gipaambit sa mga volunteers sa Benedictine Monks, Cogon, Digos City. Ang mga dagway nga puno sa kalipay ug pagpasalamat, nasaksihan sa mga volunteers. Matud pa ni Babe Gonzaga, usa ka masakiton nga nakadawat sa pahalipay: “Daku kaayo ang akong pagpasalamat niining mga gasa, tungod kay nasinati ko nga aduna pa diay Dios nga nagpadayon sa pag-alima kanamong mga masakiton ug mga tigulang”.

Mao kini ang nahitabo niadtong milabay nga Domingo sa Pagkabanhaw sa atong Ginoo, Abril 17, 2022, didto sa Digos City, diin nagkatigom ang mga volunteers niining usa ka kongregasyon, aron mobisita sa mga tawo nga nakarihistro nang daan, alang sa ilang pagdawat sa giandam nga mga gasa: napulo ka kilong bugas, nagkantidad sa usa ka libong groceries, usa o duha ka kilong karne, ug cash nga 300 Pesos.

Sa pagpakighinabi nako ngadto sa nahimong tigdumalang pari ning matang nga apostolado, sa kongregasyon sa Benedictine Monks nga si Fr. Greg Damondamon, OSB, siya miingon: “Kini usa sa mga proyekto sa ilang kongregasyon aron makatabang sa mga kabus, ilabi na sa mga timawa, nga nagpasabot, mga tigulang nga wala nay trabaho ug walay nag-ayuda kanila, mga buang ug mga masakitong tigulang nga giabandona sa mga anak o bana. Nahunong kini nga buluhaton, makadiyot tungod sa pandemic, apan niadtong Nobyembre 2021, nagpadayon nasab ang ilang programa.

Sa sinugdanan, didto nila pabisitahon sa clinic nga nahimutang sulod sa ilang monasteryo ang mga tawong narihistro sa ilang social worker nga angayang tabangan. Sa mga panahong adunay dagkung kasaulogan ang simbahan sama sa Pasko sa Pagkatawo ug Pasko sa Pagkabanhaw, ug labaw sa tanan sa piyesta ni San Benedicto, uban sa panabang sa mga volunteers mobisita gayud sila niadtong mga modawat niining mga gasa, aron usab ilang mahibaloan ang kahimtang sa mga modawat niini.

Sa pangutana mahitungod sa pagpili kon kinsa ang angayang modawat sa panabang: Miingon ang pari nga aduna silay volunteer usab nga mga social workers aron motabang pagpangita sa mga angayang tabangan. Human nga masusi sa social worker, inubanan usab sa paring hingtungdan, ang kahimtang sa matag makit-ang angayang tabangan, himoon nila ang pag-rehistro niini ug sugdan dayon sa paghatag ug ayuda matag bulan. Daku usab ang papel sa pari alang sa mga pagtabang nga espirituhanon, ilabi na ang pagpakumpisal ug pagpakalawat sa mga masakiton ug mga tigulang. Tinuod daghan kaayo ang ilang nakita nga nanginahanglan, apan tungod sa limitasyon sa ilang natigom nga salapi, mao ra gayud una kining 55 ang ilang gihatagan ug pryoridad.

Nahuman ang pagpanghatag sa gasa alang sa mga kabus sa alas dose sa udto, niadtong adlawa, diin malipayon kaayo ang mga 15 ka mga volunteers nga kadaghanan professionals, nagkahiusa sa, kasinatian sa pagpaambit sa mga gasa uban sa pagsaulog sa Pasko sa pagkabanhaw sa daplin sa baybayon.