Ang Diosnong Kaluoy Naga-uban Kanunay Sa Atong Kinabuhi

Sukad sa tuig 2000, gisaulog sa universal nga Simbahan ang pagtak-op sa Oktaba sa Pasko sa Pagkabanhaw ang Domingo sa Diyosnong Kaluoy.

Dinhi sa Arkidayosis sa Dabaw, saulogon ning maong dakong solemnidad ang ika-32 nga kapistahan pinaagi sa pagdapit sa tanan ilabi na ang mga deboto sa Diyosnong Kaluoy diha sa kamaya sa mapasayloong gugma sa Diyos sanglit mao kini ang klaro nga gipadayag diha sa Paschal Mystery ni Hesu Kristo.

Sa iyang encyclical sa tuig 1980 nga Dives in Misericordia (“Rich in Mercy”), gisulat ni Santo Papa Juan Pablo II nga, “Believing in [God’s] love means believing in mercy. For mercy is an indispensable dimension of love; it is as it were love’s second name and, at the same time, the specific manner in which love is revealed” (No. 7).

Mismo ang Halangdong Arsobispo sa Dabaw nga si Most Rev. Romulo G. Valles, D.D, ang magsaulog sa Santos nga Misa sa alas-3 ang takna sa hapon sa San Antonio Parish, Agdao.

Tema sa maong kasaulogan sa Domingo sa Diyosnong Kaluoy ning tuiga mao ang: “Ang Diosnong Kaluoy naga-uban kanunay sa atong kinabuhi.”

Isip kabahin sa kasaulogan sa Divine Mercy Sunday, gisugdan ang indibidwal nga pag-nobena sa mga deboto atol sa Biyernes Santo kutob petsa 17 sa Abril ug gihimo ang ika-4 hangtod ika-9 nga mga novena ug misa sa nagkalain-laing simbahan.

Gikalipay sa mga deboto nga daghan na ang makatambong sa maong kasaulogan ubos sa Alert Level 1 nga gideklara sa Syudad sa Dabaw diin mamahimo na ang panagtapok ug mamahimo na usab nga pun-on sa iyang kapasidad ang simbahan.

Usa kini ka butang nga gipasalamatan sa Divine Mercy Apostolate sa Arkidayosis sa Dabaw ubos sa pagpangulo sa Lay Head Coordinator nga si Joji Ilagan Bian.

Iyang gibutyag, nga bisan sa panahon sa paghigpit sa mga protocol sa panagtigom, gipangitaan ug pamaagi sa mga lideres sa Divine Mercy Apostolate nga makapahigayon gihapon ug orientation sa mga buot nga maghimo sa debosyon pinaagi online.

Gimugna sa milabay nga tuig ang pundok sa mga mamumulong ubos sa Prophetic Ministry nga gipanguluhan ni Dr. Catherine P. Zamoras nga gibahin sa duha ka team nga maoy mohatag sa 9 ka mga elemento sa Diyosnong Kaluoy sa online kon virtual nga pamaagi.

Apan, sa dihang gideklara na ang Alert Level 1 sa Syudad sa Dabaw, gisugdan na usab ang face to face nga paghatag sa orientation sa Home Evangelizaton Program sa matag parokya o GKK.

Sa samang higayon, gisugdan na usab ang first Tuesday Devotion sa maong kapunungan nga naundang niadtong tuig 2020 tungod sa pandemiya.

Luyo niining tanan, padayong nagtapok matag semana ang mga nagkalain-laing chapters sa Divine Mercy Apostolate sa mga parokya sa Arkidayosis sa Dabaw ug ingon man sa nagkalain-laing buhat sa Kalouy sama sa pagbisita sa mga masakiton, memorial service alang sa mga namatay, pagsaulog sa kapistahan sa nagkalain-laing parokya, Divine Mercy Feast Day sa mga Bikaryato.

Tinuig nga gisaulog usab ang kapistahan ni St. Faustina sa Oktubre 8, Mother of Mercy Feast Day sa Nobyembre 16.

Si Sister Mary Faustina Kowalska, natawo niadtong 1905, usa ka madre sa Congregation of the Sisters of Our Lady of Mercy sa Poland kinsa unang mipakita kaniya si HesuKristo niadtong Pebrero 22, 1931, ug gimanduan siya sa pagsulat sa tanan Niyang isulti kabahin sa Diyosnong Kaluoy.

Si Hesukristo usab ang nagtakda sa kapistahan sa Diyosnong Kaluoy ingon man sa tanang mga grasya nga madawat sa mga maghimo sa debosyon ug ipakuyanap sa tibuok kalibutan.

Gitawag sa Ginoo si Sister Faustina isip iyang “apostle of mercy” kinsa maoy nagdokumento sa tanang mga butang nga gipasulat kaniya ni Hesukristo nga gibutang sa iyang diary.

Nakadawat ug ecclesiastical approval gikan sa Congregation for the Doctrine of the Faith sa tuig 1979 ang maong Diary.

Dugang pa, giila ni Santo Papa Juan Pablo II ang mga sinulat ni Sister Faustina nga usa ka mensahe nga gikan gayud kang Kristo, ug adunay kalabutan sa tanang katawhan sa tibuok kalibutan.

Niadtong Abril 30, 2000, ang labing unang Domingo human sa Pasko sa Pagkabanhaw, gi-canonize ni Pope John Paul II si Sister Faustina Kowalska ug deklara sa iyang homiliya nga ang maong adlaw, buot niay nga ang ikaduhang domingo human sa Pasko sa Pagkabnhaw gikan niadtong higayona sa tibuok kalibutan tawgon kini nga ‘Divine Mercy Sunday.’”

Subay usab sa kagustuhan sa Santo Papa, sa Mayo 5, 2000, ang Congregation for Divine Worship and the Discipline of the Sacraments nagpagula ug dekreto nga opisyal nga nag-establisar sa ikaduhang domingo sa Pasko sa Pagkabanhaw isip “Divine Mercy Sunday.”

Mao na kini matud pa ni Santo Papa Juan Pablo II ang mapadayonon nga selebrasyon sa EASTER, nga matud pa ni Kristo, ang gasa sa EASTER alang sa tibuok kalibutan.