Unang Kapistahan ni Sr. San Vicente Ferrer Gihandum

Niadtong Abril 1966, sa lugar sa Sitio Crossing, Brgy. Malabog, tungod sa panagsabot sa duha ka hut-ong sa pagtuo nga mao ang Katoliko og Filipinista, unang natukod ang kapilya sa luna ni anhing Bro. Semeon Mangmang ug ang napili nga patron mao si Sr. San Vicente Ferrer, kini usab tungod sa suhestiyon ni anhing Nanay Regina Gudito. Niadtong Abril 1972, atol sa pagsaulog sa Kapistahan ni San Vicente Ferrer, gimisahan sa unang higayon ang kapilya nga niadtong panahon nahisakop pa sa Sta. Catalina Parish, Lasang nga karon mao na ang St. John the Baptist. Sugod niadto, matag Domingggo aduna na silay Kasaulogan sa Pulong, ubos sa Pagdumala sa KSP Lider nga si Anhing Bro. Markos Vistal. Tuig 1989, gibalhin ang kapilya sa luna ni anhing Bro. Francasio Ongcay uban ang ilang unang nahimong PSK nga si Tatay Erning Montealto nga karon usa usab sa mga miyembro niining katilingaban. Og niadtog Abril 5, 2022 ila nang gisaulog ang ika-50 ka tuig nga kapistahan kon Golden Fiesta Celebration. Ug kini karon gidumala sa mga GSL, PSK: Jerry Piogado, PSL: Jaime Cenabre, Juviel Latonio ug Soliman Vistal, PSP: Jocelyn Lecera, Elenita Saplad og Rosalina Espina, PSA: Evelyn Pongas ug Jonalyn Caballero, SocCom: Mercidita Sumoroy, PSKB: Mr. & Mrs. Soliman Vistal ug PSB: Josh Vistal, uban usab sa suporta sa ilang mga miyembro.

Pasado alas diyes sa buntag nga gisugdan ang misa sa kapistahan nga gipanguluhan ni Rev. Fr. Arnold Balaquinto, kura paroko sa San Roque Parsih- Malabog, diin nahisakop ang maong GKK. Sa iyang homiliya iyang gipunting ang Synod of Synodality nga adunay tumong nga hiusahon ang tibuok simbahan kay tungod matag-usa kanato gipiyalan man sa pagdala sa matag-usa ngadto sa sabakan sa Ginoo. Matud pa niya nga “We are gifted not to be kept but to be shared” nga kita gigasahan aron kini atong ikapaambit nganha sa uban diha sa atong pagpaningkamot subay sa dalan nga matarong sanglit tulubagon man nato kini.

Si San Vicente Ferrer usa ka anghel, patron sa mga magtutukod, banggiitang mamumulong, maampoon og maalagaron. Sa atong pagsaulog sa ika-500 Ka Tuig sa Kristyanismo sa Pilipinas uban sa Tema nga “Gifted to Give”, kita unta mamahimong sama kang San Vicente Ferrer, nga mamahimong manggihatagon pinaagi sa pagsangyaw sa maayong balita sa uban, sa paagi nga kita mapaubsanon ug maalagaron. Kay uban sa kanunay nato nga pag-ampo, molambo gayud ang katilingban diin kita nahisakop kung kita adunay katakos nga makiglambigit sa uban nga adunay pagsabot ug labaw sa tanan ang pagkinabuhi nga sentro ang Ginoo. Sama ni San Vicente, mamahimo usab kita nga makakabig sa atong isigkaingon ngadto sa kaayuhan pinaagi sa atong mga buhat nga maayo.

Viva Sr. San Vicente! Sa kanunay, Dalaygon ang Dios!

(Joziel Crodua | Youth SocCom Sona 2 of SRP Malabog)