Ang Akong Misyon, Akong Pamilya

Duha ka adlaw una ang bagyong Odette niadtong Disyembre 15, 2021, miapil ako sa usa ka misyon padulong sa Archdiocesan Shrine sa Our Lady of Guadalupe sa syudad sa Cebu. Kadlawon pa migikan na kami gikan sa bukid sa Dalaguete ug nakatapad ko si ate Libeth. Nakabantay siya sa akong puti nga bistida ug didto siya nagsugod og tawag nakog sister. Nangutana siya kon asa ko paingon, akong gipaambit nga usa ako ka misyonero gikan Davao ug nga naghalad akog mga pag-ampo sa bukid sa Dalaguete, ug mao usab ang akong katuyoan sa Guadalupe, bisan wala pako mahibalo adtong higayona sa kadako sa delubyo nga paabotay.

Kadtong adlawa ang last day nako sa Cebu, adlawng Myerkules, kinaugmaan muuli na ako sa Davao human sa 66 ka adlaw nako nga pagpuyo sa bukid. Sa among pagbaybay sa dalan, nagsugod na si ate Libeth ug saysay sa iyang kinabuhi, ug sama nako, misulod sab kuno siyag kumbento sa bata pa siya tungod gikinahanglan siyang biyaan sa iyang mama nga nag domestic helper sa Hongkong. Apan wala siya midugay ug nitakas pauli sa Cebu. Didto siya gipakasal sa iyang lola sa usa ka mas hamtong nga ulitawo. Siya miingon nga sa pagka karon, aduna siyay nwebe ka mga anak. Duha niini nakalampos na. Usa kanila maestra ug adunay gamay nga negosyo ug ang isa manager sa usa ka fast food chain. Nakalampos sila pinaagi sa tanan nilang hago sa uma. Ang iyang mga anak dili maulaw nga mag daro ug magtanom. Gani samtang sila skolar, nagpadayon sila sa pagtabang sa ilang ginikanan sa pagtanom.

May usa sab kanila nga special, apan padayon gihapong mutabang sa uma. Kumpisal ni ate Libeth usahay makahinuklog siya ug pangutana kung unsa untay iyang dangatan kung mipadayon siya sa pagka madre. Apan sa iyang pagpamalandong tingali, kini gayod ang iyang misyon sa kalibutan, ang mahimong inahan.

Dili gayod sayon ang kinabuhi, tungod anaa kanato ang gahom sa pag pili sa mga pinaka importanteng desisyon sa atong kinabuhi apan dili nato kalimtan nga kita giniyahan sa balaang Espirto Santo. Kung asa kita karon, kini dili coincidence, kini plano sa Ginoo kanato, kining tanan may saysay.

Sa akong pagpamalandong karon, dakong milagro ang akong pag-uli tungod pipila ka oras milabay human sa akong pagsakay, gi kansela na ang tanang byahe pagawas sa syudad. Tuod, ang akong pag adto sa Cebu apil sa dakong plano sa Ginoo. Nagmalipayon ako nga akong nailhan si ate Libeth ug sa akong huna-huna bisan tuod wala ako madayon sa pagkamadre, tingali sama niya, ang akong misyon ang akong pamilya. CMAC