Pulong sa Kinabuhi Marso 2014

“Kon tumanon ninyo ang akong mga sugo magpabilin kamo sa akong gugma ingon nga ako nagtuman sa mga sugo sa akong Amahan ug nagpabilin sa Iyang gugma.” (Juan 15:10)

Ang Pulong sa Kinabuhi karong bulana, gikutlo sa ika-upat nga ebanghelyo, gikan sa kapitolo 14 hangtud sa 17 sa ebanghelyo ni San Juan, diin si Jesus nakigpulong sa mga apostoles human sa kataposang panihapon. Iyang gihatagan ug kahalangdon ang kamatuoran nga kita magpabilin diha sa iyang gugma pinaagi sa pagtuman sa iyang mga sugo.  Sama ra ning mga pulongan sa nahiunang bersikulo 14:15 diin si Jesus miingon ”Kon  nahigugma kamo Kanako tumana ninyo ang akong mga sugo.”  Dinhi atong maklaro nga ang kinahanglang magpaluyo o hinungdan sa atong pagtuman sa mga sugo ni Jesus mao ang atong paghigugma Kaniya.

Ang resulta niini mora ug tuyoktuyok lamang tali sa gugma alang kang Jesus ug ang pagtuman sa Iyang mga sugo. Ang gugma alang kang Jesus maoy magdasig kanato sa pagpuyo sa iyang mga pulong.  Ug pinaagi sa pagpuyo sa iyang mga pulong  magpabilin kita diha sa Iyang gugma, nan, labi pang motubo ang atong gugma alang Kaniya.

“Kon tumanon ninyo ang akong mga sugo magpabilin kamo sa akong gugma ingon nga ako nagtuman sa mga sugo sa akong Amahan ug nagpabilin sa Iyang gugma.”

Ang importante mao ang pagpabilin diha sa iyang gugma.  Apan, unsa man ang gipasabot ni Jesus niini?

Sa walay duhaduha, Iyang gipasabot nga ang patuman sa Iyang mga sugo, maoy timaan ug magmatuod nga kita tiunay Niyang mga higala.  Gumikan niining pagtuman sa Iyang mga sugo, si Jesus makasukli ug makapamatuod kanato sa Iyang pagkahigala.

Apan mora ug duna pay lain niyang buot ipa-abot kanato.  Unsa man kini?  Pinaagi sa pagtuman sa Iyang mga sugo, kita molambo diha sa Iyang gugma nga walay lain kondili si Jesus mismo.  Iyang gipaambit kanato ang Iya mismong pamaagi sa paghigugma nga atong makita diha sa Iyang kinabuhi adtong dinhi pa Siya sa kalibutan.  Usa kadto ka gugma, nga naghiusa Kaniya sa Iyang Amahan ug sa samang panahon, kining gugmaha ang nagtukmod Kaniya  nga mahisama ug mahimong usa sa Iyang mga igsoong babaye ug lalaki, ilabi na sa mga kabos, sa mga mahuyang, ug sa mga langyaw.

Ang gugma ni Jesus usa ka gugma nga makaayo sa tanang samad sa kalag ug lawas, usa kadto ka gugma nga maghatag  kalinaw ug kalipay sa tanang kasingkasing; usa ka gugma nga makapukan sa tanang pagbahinbahin pinaagi sa pagpakig-uli sa panaghiusa diha sa tanan.

Kon atong puy-an kining Iyang mga pulong mopuyo si Jesus dinhi kanato, ug Iya tang himoon isip kasangkapan sa Iyang gugma.

“Kon tumanon ninyo ang akong mga sugo magpabilin kamo sa akong gugma ingon nga ako nagtuman sa mga sugo sa akong Amahan ug nagpabilin sa Iyang gugma.”

Unsaon man nato pagpuyo niining Pulong sa Kinabuhi karong bulana?  Inubanan sa hugut nga tinguha, maningkamot ta sa pagtuman sa tumong aning Pulong sa Kinabuhi karong bulana:  usa ka kristohanong kinabuhi nga dili mahiluna sa pagbuhat sa kinagamyang tulubagon, dili malipay sa pagsunod sa mga sugo sa pamaagi nga dili tininuod, kondili usa ka kristohanong kinabuhi nga nagtimaan sa pagkamanggihatagon.   Ing-ani ang gibuhat sa mga santos sa ilang pagsunod sa Iyang mga sugo ug tungod ani, sila nangahimo nga buhing Pulong sa Dios.

Sulod niining bulana, hatagan nato ug kahalangdon  ang usa sa Iyang mga Pulong,  usa sa Iyang mga sugo ug ato ning paningkamotan sa pagpuyo sa atong kinabuhi.  Tungod  kay ang bag-ong sugo ni Jesus  (“Maghinigugmaay kamo sama sa akong paghigugma kaninyo”)  mao may sentro o kalangkoban sa tanan niyang mga Pulong, nan, ato ning paningkamotan sa pagpuyo sa tim-os ug tiunay nga paagi. (Chiara Lubich)