Unang Pagkalawat sa mga Kabataan, Gipahigayon

Gipahigayon ang seremonyas sa Unang Pagkalawat o First Communion sa GKK Santo Nino, Sitio Sarro, Brgy. Manuel Guianga, Tugbok District, Davao City niadtong March 29, 2022. Ang maong seremonyas gipangulohan ni Rev. Fr. Mark Jann Perez, OSJ, ang kura paroko sa San Francisco de Asis Parish – Tagakpan.

26 ka mga kabataan gikan sa managlahi nga mga GKK ang nakadawat sa unang higayon sa Sakramento sa Eukaristiya. Ang mga first communicants naggikan pa sa mga kasikbit nga mga GKK, sama sa GKK Sagrada Familia sa Costan Village, Brgy. Manuel Guianga, ug GKK San Vicente Ferrer sa Bartolome, Manuel Guianga.

Usa kini ka mabungahon nga higayon para sa mga first communicants kay sa sulod sa duha ka tuig, walay First Communion nga gipahigayon tungod sa mga restriksyon diha sa lokal nga panggamhanan batok COVID-19.

Matud pa sa usa ka first communicant, excited kaayo siya nga makadawat sa Santos nga Eukaristiya tungod kay makaapil na daw siya sa kalawat matag simba niya kauban iyang inahan ug amahan.

Ang maong kalihukan gisugdan sa alas-9 ang takna sa buntag pinaagi sa pagpahigayon sa Sakramento sa Kumpisal. Pagkahuman, gisunod dayon ang Santos nga Misa.

Sa homiliya, miingon si Fr. Perez sa mga first communicants, “Kini ang pinaka-importanteng higayon sa inyong kinabuhi kay inyo nang pagadawaton si Kristo pinaagi sa pan ug bino nga gikonsagrar diha sa Santos nga Misa.”

Gihatagan og duso ni Fr. Perez ang nahisulat sa ebanghelyo, nga “Kung kinsa kadtong mukaon sa Iyang unod ug muinom sa Iyang dugo makabaton og kinabuhing dayon.”

Malipayon usab ang mga ginikanan nga miduyog sa ilang mga anak; ingon man ang mga Katekista sa nagmalampusong selebrasyon.

Sa pagpahigayon sa Unang Pagkalawat, ang hagit sa usa’g usa kanila, nga unta diha sa ilang kinabuhi, mapuy-an nila ang kinabuhing Kristohanon diha sa ilang pagkalawat sa lawas ug dugo ni Kristo pinaagi sa ilang pagkamasinugtanon, pagkamahigugmaon, ug pagka-manggihatagon. (Ednalyn L. Malacura – SFDA SoCCom)