Dugang kahibalo mahitungod kang Bishop Alo

MATI CITY –  “Bulawanon” gayud ang pagsaulog ni Bishop Patricio H. Alo sa iyang ika-50 nga anibersaryo sa pagkapari, sa mga gold nga dayan-dayan nga giandam alang sa selebrasyon, ug labi na gyud sa pagkasayud sa iyang yanong pagkatawo nga buot lamang matuman ang kabubut-on sa Diyos diha sa iyang kinabuhi, gikan sa pagkabata hangtud sa kasamtangang pangidaron nga 74.

Natakda ang golden sacerdotal jubilee celebration sa Marso 14, ug ang aktwal nga panghitabo makaabot sa sunod na nga pagpatik sa Davao Catholic Herald (DCH), pinaagi sa halandong pakig-alayon sa mga higalang staff sa maong mantalaan., kon diin si DCH Board Chairman Arsobispo Romulo G. Valles mao ang homilist sa Santos nga Misa sa San Nicolas de Tolentino Cathedral.

Ang among inahan, si Dolores “Nanay Loleng” Hacbang Alo mao gayud ang kusug nga inspirasyon sa pagbansay ug paglambo ni Bp. Pat sa iyang ispirituhanong kinabuhi—life of Faith.  Si Nanay Loleng usab ang nagsugilon kaniya kabahin sa malangkubon ug aktibong people’s development vision ni Obispo Sofronio “Tiyo Poyoc” G. Hacbang nga nahimong numero unong role model sa obispo; gani giuna paghan-ay ni Bp Pat ang larawan ni Tiyo Poyoc, ang nailang “youngest bishop in the world” sa edad nga 30, sa iyang koleksyon sa mga litrato.

Masubsob ang academic studies sa obispo gikan sa elementarya hangtud teyolohiya; ug kini giila sa iyang pagmintinar og consistent 1st honors, ug unya meritissimus sa STD, Doktorado sa Sagrada Teyolohiya.  Apan nalantaw na usab niya ang dakong hagit sa ebanghelisasyon, labi na sa mga layko, ug pinaagi sa media, hinungdan nga ang dokumento Batikano II kabahin sa Apostolado sa mga Layko maoy nahimong titulo sa iyang tesis/disertasyon, ug sa iyang pagkapari makanunayon ang iyang pagsulat og mga artikulo sa mga lokal nga mantalaan sama sa Sunstar ug Daily News sa Sugbo (Cebu City), ug pag-guest sa mga programa sa radyo ug telebisyon, hangtud sa iyang pagtukod og sariling Radyo ug Cable TV sa diyosesis sa Mati.

Gi-adoptar niya ang ispiritualidad Carmelita sa iyang pagka-sakop sa 3rd order sa Order of Discalced Carmelites (OCD), samtang ispisyal nga patron niya si Señor San Jose nga mao usab ang patron sa Social Communications sa Mati—March 19 ang anibersaryo sa duha ka radyo, ang DXHM-AM (Heart of Mary) ug DXDV-FM (Dei Verbum), ug ang Cable TV ang dedicado sa Santisima Trinidad (Trinity Cable TV – TCTV).

 Sa pagduol sa kapistahan ni Señor San Jose, si Bp Alo nagpasalig nga, sama ni Sta Teresa de Avila, nagtuo siya nga wala gayuy dili madawat nga pabor kon kini iagi sa pagpangama ni San Jose; gipasabot niya nga unahon kanunay ang pagtuman sa kabubut-on sa Diyos labaw sa kaugalingon—“Seek first the Kingdom of God and all the other needs will be granted you”.(Sr. Marietta Alo, OND)