Nganong lisod man mangumpisal?

Daghan kanatong mga Katoliko ang abtik ug maukyabon kaayong nagpabadlis sa abo niadtong miaging Myerkules, Marso 2. Malipayon kaayo tang midawat sa simbolo sa atong pagkatawhanon ug pagkahuyang, simbolo nga kitang tanan madunot gayod. Magarbohon kitang mailhan nga mga Katoliko tungod niining mga krus sa atong agtang bisan tuod dili gani ta maka simba matag Dominggo. Sa pag abli sa panahon sa kwaresma, nahinumdom ba kita unsay giingon sa pari una nagpahigayon sa maong pagbadlis? “Hinulsoli ug biyai ang inyong mga sala ug tuohi ninyo ang Maayong Balita”.

Duyog niining hagit, sa paghinulsol, giawhag kitang tanan sa pagpangumpisal. Apan, ubay-ubay gayud kanato ang maglisud ug tugyan sa atong mga sala diha sa mga alagad sa simbahan; ang atong mga pari. Ngano man kaha kini? Sa akong pakighinabi sa pipila nako ka mga higala, ilang gipaambit nga usahay dili magmahimong makahuloganon ang ilang pagpangumpisal tungod kay sa ilang pangatarungan, makasala raman gihapon ug sigurado sila nga inig tapos sa maong sakramento madam-ag nasad sila pagbalik ug mapakyas. Sama sad ba niini imong gibati igsoon? Pila ka tuig naman kang wala ka pangumpisal?

Ang uban kanato wala pa duawa sa atong mga konsensya tungod sa atong huna-huna ginagmay ra man ang atong mga sala ug dili sama sa gitawag nato nga mga mortal sins nga bug-at ug gikinahanglan gayod nga pangayoan ug kapasayloan. Kung adunay mga gatuo nga gamay ra ang ilang sala, aduna say mga tawo nga gilikay-likayan ang sakramento tungod sa kabug-at sa ilang sala nga maulaw na sila mutugyan tungod kuno madaot ang ilang kadungganan. Ang uban kanato duol ug suod sa atong mga kaparian ug gani, kung matungnan kita sa pari nga atong higala, mag duha-duha kita kay unyag hukman kita ug tamayon.

Garbo kini, kini ang nagpamatuod nga dili kita andam nga maghinulsol o nga wala gayud kita nagbasol sa atong mga binuhatan nga nakapasakit sa uban. Mas gipalabi nato ang panlantaw sa tawo kontra sa panlantaw sa Ginoo ug kinsa o unsa kita.

Dugang pa niana, ang uban, wala na usab kahinumdom sa proseso diha sa pag tugyan sa mga sala tungod kay kausa pa sila ka pangumpisal sukad ma sukad. Mahinumdom ta nga kini usa ka requirement sa simbahan una nato madawat ang atong unang kalawat.

Alang sa atong kasayoran kini mao ang mga ang-ang sa pagpangumpisal.

• Sign of the cross kon pagpanguros.
• Pagbungat niining mga pulonga “bless me father for I have sinned” o “bendisyoni ko padre kay nakasala ako”.
• Pagdumdom ug kanus-a o pila ka adlaw, bulan o tuig na ang milabay sukad sa imong pagpangumpisal.
• Pag tugyan sa imong mga sala.

Garbo usab nato ang pag isip nga wala gayud kitay salang nabuhat, kinahanglang mahinumdom kita nga dili lang sa buhat ang pagpakasala kundi sa pulong ug labi na sa huna-huna. Atong balikan ang giingon ni Fr. Roy Cimagala nga kinahanglan sa matag buhat atong intensyon maayo gayod. Kay kon ang atong intensyon dili maayo, bisan pa ang buhat maayo, kita nakasala gihapon.

Tuod man nga kita tawo ug lagmit makasala apan dili nato likayan ang pag-ako o pag take responsibility nga kining pagpakasala atong tulubagon isip tawo ug mga anak sa Ginoo. Ulaw man apan pinaagi sa grasya sa Ginoo, atong makaplagan ang kaisog ug kadasig nga magmahinulsulon ug muatobang Kaniya diha sa sakramento sa kumpisal. Wala man kita mahibalo sa mga panghitabo apan milaom kita nga pinaagi sa grasya ug kalooy sa Diyos dili kita mahibulag Kaniya. Dakong kamatuoran ang atong kalipay tungod ang Diyos bisan kanus-a ug sa tanang panahon dili gayod kita buhian, gani iyang gipadala ang iyang bugtong anak ug gitugot nga Siya mamatay alang sa atong kaluwasan ug kapasayloan sa atong mga sala.

Kitang mga Katoliko gi-awhag nga bisan kausa sa tibuok tuig makapangumpisal. Ang kabug-aton isip responsibilidad sa usa ka maayong sumusunod ni Jesus dili nato mabati kung wala kitay paghigugma Kaniya. Wala kita mahibalo ug kanus-a ang adlaw sa paghukom, apan nindot pamalandongan nga andam kita sa panahon nga kini muabot sa atong kinabuhi. Ug usa sa pagpangandam ang pagpangayog kapasayloan sa atong Ginoo pinaagi sa sakramento sa kumpisal.

Karong panahon sa kwaresma, magmaisugon kitang mubarog ug wagtangon ang kaulaw ug kahadlok batok sa sala. Dili kita hingpit apan naningkamot ug nanimbasog kita pinaagi sa grasya sa Diyos. (Christine Camus)