Buhi gayod ang Simbahan

Marso 15, adlawng Martes, gipahigayon ang ikaduhang bahin sa Archdiocesan pre-synodal meeting sa Our Mother of Perpetual Help Gym sa dalang J.P. Laurel diin gisalmotan sa kapin usa ka gatos ka mga representante gikan sa mga parokya.Gihimo ang reporting sa nagkadaiyang pre-synod synthesis sa matag bikaryato. Anaa sa traynta ang mga kaparian ug relihiyoso nga miapil uban sa kadaghanan nga layko.

Ang mga misalmot seryoso nga naminaw sa mga representante nga kaparian ug layco sa ilang pagbatbat diha sa mga pinakaimportanteng punto nga migawas sa matag konsultasyon. Ang maong meeting nahuman lamang tunga sa adlaw.

Pipila ka mga punto nga mibalik-balik sa matag report ang pagpangusog ug pagpalig-on sa mga relasyon diha sulod sa simbahan, ilabina ang relasyon sa pamilya, GKK ug GSLs ngadto sa mga kaparian diha sa parokya ngadto sa mga dili aktibong myembro sa simbahan. Nagpadayag ang pipila sa ilang kalipay apil na ang atong Arsobispo sa Dabaw, Most Rev. Romulo G. Valles nga miingon, “I COULD NOT ASK FOR MORE” tungod nagmalipayon siyang naminaw sa mga resulta sa matag konsultasyon ug nga iya gayong napamatud-an nga hanas na kitang mga taga Dabaw sa pagpatigayon og synods sukad pa kaniadto.

Tataw kaayong madungog sa matag bikaryato ang panghindahay nga kanunayng maapil ang tanan sa mga diskurso sa simbahan hilabi na kadtong mga naa sa kilid2x o periphery ug ang mga gitawag ug marginalized. Mapaubsanon usab nga miako ang mga lideres nga kulang pa sa duso ang mga katekismo pinaagi sa malangkubon nga mga pormasyon sulod sa simbahan.

Gipunting ni Bishop George Rimando sa iyang paghatag og personal notes nga ang atong simbahang Katoliko, BUHI GAYOD. Atong nakab-ot ang atong mga tumong niining pre-synodal meetings luyo sa mga pagsulay sa pandemya ug mga eskandalo sa simbahan. Iya usab nga giklaro nga wala pa kita sa proseso sa pag huna-huna ug mga solusyon alang niining mga panghupaw sa katawhan apan duyog kitang tanan sa pagpadulong nianang dalana.

Ang ika tulo ug kinaulahiang bahin sa maong presynod meeting ipatigayon sa Mayo 21 adlawng Sabado, ug gilaoman nga masumite ang 10-page synthesis sa CBCP sa Hunyo 3. (Christine Mae Camus | Photos by Luther Lutero)