Bangon Tawo Adunay Dios nga Mahigugmaon

Ika-upat nga Domingo sa Kuwaresma (March 27, 2022)
Jos 5:9a, 10-12 / Ps 34:2-3, 4-5, 6-7 / 2 Cor 5:17-21 / Lk 15:1-3, 11-32

Ang Ebanghelyo mahitungod sa duha ka mga anak nga mausikon. Naghan-ay niining kinaiya sa tinuod nga Amahan nga mao ang Dios.

Ang tawo dali rang mo kondenar, apan ang Dios mopadayon sa pagpasaylo. Ang tawo mohatag dayon sa silot, apan ang Dios mopadayon sa iyang pagkamaloloy-on. Ang tawo moakusar, apan ang Dios mopadayon sa pagsabot, pagpangita sa mga nawala, padayon sa pagdawat ug sa kanunay moingon: “Maglipay kita ug magkombira kay ang imong igsoon namatay na ug karon nabuhi, nawala ug karon hikaplagan na!” Unsa pa may atong gipaabot?

Dili gayud nato matugkad ang kalapad ug kalawom sa gugma sa Dios alang kanato. Bisag sa makapila nga mga higayon nga mahimulag ug mobiya kita kaniya kay labi pa natong pilion ang kalibutanong mga butang, gahom ug bahandi, abli gihapon ang iyang kasingkasing sa paghatag sa iyang pasaylo niadtong naghinulsol sa ilang mga sala. Abli sa kanunay ang iyang ganghaan sa langit aron mahinangupon nga modawat kanato pag-usab nga mopuyo didto sa Langitnong Puloyanan.

Busa, pangayoon nato nga unta kanunay kitang giyahan sa Dios pinaagi sa Espiritu Santo, nga makalahutay kita sa atong panaw padulong ngadto sa Langitnong Puloy-anan. Taliwala sa kanunay natong paglukapa sa sala. Bangonon kita sa Dios aron sa pagpadayon sa unahan diin nagdupa sa kanunay ang mga kamot sa Ginoo nga mahinangupon ug mainitong mosugat ug mogakos kanato.