Dinner for a Cause: Gipatigayon atol sa anibersaryo sa DXHM 549 AM ug DXDV 97.5 Spirit FM

Nagmalampusong nagsaulog ang atong kaubang estasyon sa Catholic Media Network, sa Diocese sa Mati sa ilang ika-31 nga anibersaryo sa DXHM 549 AM radio ug ika-13 nga anibersaryo sa DXDV 97.5 SPIRIT FM niadtong Sabado, Marso 19, 2022.

Isip pagpadayag sa ilang kinasing-kasing nga pagpasalamat ngadto sa ilang mga tigpaminaw ug benefactors sa makanunayong pagpakig-uban sa ilang panaw sa milabay nga mga katuigan, sa pakighiusa sa ilang misyon sa ebanghelisasyon, sa pagbarog alang sa kamatuoran, gipahigayon ang DINNER FOR A CAUSE sa St. Therese Gym sa Clergy House Compound, Madang, Barangay Central, Mati City sa alas sais ang takna sa gabii kung diin mitambong ang mga staff ug media team sa DXGN 89.9 Spirit FM-Davao gikan sa dakbayan sa Dabaw aron usab sa pag pakita ug suporta isip sister station.

Ang kahaponan bisan sa kadag-om napuno diha sa sidlak sa mga pahiyom sa mga katawhan nga mitambong sa maong dinner event. Gisugdan kini pinaagi dinha sa pag-ampo alang sa mga grasyang nadawat ug pag basbas sa mga pagkaon nga pagaambitan. Human sa panalangin pormal nga giablihan ni Reberendo Padre Alfe Alimbon, station manager, ang event ug siya misaysay nga usa sab siya sa mga produkto pinaagi sa inspirasyon sa estasyon nga sa gamay pa siya, nangandoy siyang mahisama sa mga kaparian nga madungog dinha sa radyo.

Ang mga bisita giharanahan ug maanindot nga mga awit samtang gipahigayon ang pagkuha ug litrato sa matag lamesa kauban sila Bishop Abel Apigo, obispo sa Diocese of Mati, Reberendo Padre Alfe Alimbon, station manager ug Sr. Everlita Huete, finance in-charge.

Adunay wine toasting nga gipahitabo alang sa kalamboan, pasalamat sa mga niaging katuigan ug ang paghandom sa mas mabungahon pang mga tuig diin gipasiugdahan kauban ang atong mga alagad sa simbahan ug gobyerno.

Sa hapit na matapos ang event, gihalaran ug tribute ang usa sa kinadugayan nang empleyado sa estasyon nga si Kuya Cesar Amban nga nangalagad sulod sa treintay-uno ka tuig ug siya gihatagan diha sa plaque of recognition inubanan sa honorarium ug standing ovation.

Naghatag si Bishop Abel sa iyang paniradong mensahe ug iyang gihatagag kabug-aton ang mensahe gikan sa ebanghelyo ni San Mateo adtong adlawa atol sa kapistahan ni San Jose, bana ni Maria. Kini nag punting sa maayong balita nga gipadayag sa anghel pinaagi sa damgo.

Sumala pa ni Bishop Abel, nga ang maayong balita nga gipaagi sa damgo ni San Jose, mao ra gihapong balitaa ang atong gisibya sa bag-ong panahon karon. Walay kausaban, ug walay paglubad nga maayong balita. NEWS, tungod kay dili ug never nga ma irrelevant ug karaan. Ang atong misyon isip mga Katolikong magsisibya dili makapadayon kon ang mga materyales ug equipments dili maka apas sa mga bag-ong teknolohiya, busa gipatigayon ang maong event. Ang pipila ka mga fund raising projects maka hatag ug dakong tabang sa pagpalambo ug mas pagpakusog sa pundasyon dinha sa estasyon aron mas daghan pa ang matandog pinaagi sa good news nga atong ginapaambit.

Sa katapusan, gipasalamatan ni Bishop Abel ang mga mitambong tungod kai sila nahimong mga instrumento sa pagpakaylap sa ebanghelyo pinaagi sa pag suporta sa estasyon nga sa iyang mga pulong, “thank you for being the conduit for bringing the gospel to the ears of the people”. (Christine Mae Camus)