“Gawas sa Simbahan walay kaluwasan”?

P: Unsa man ang bugkos tali sa Simbahang Katoliko  ug sa mga dili Kristohanong relihiyon?

T: Anaay nagbugkos tali sa tanang katawhan nga nagsumikad, labina, sa mao rang gigikanan ug padulngan sa tibuok tawhanong kaliwatan. Miila ang Simbahang Katoliko nga bisan unsang mayo ug matuod nga anaa sa ubang mga relihiyon nagagikan sa Dios ug nagasalamin sa iyang kamatuoran. Sa ingon niini makapaandam kini sa pagdawat sa Ebanghelyo ug makapasibot padulong sa kahiusahan sa katawhan diha sa Simbahan ni Cristo.

P: Unsa man ang kahulogan sa giingon nga “Gawas sa Simbahan walay kaluwasan”?

T: Kini nagapasabot nga ang tanang kaluwasan  nagagikan kang Cristo, ang Ulo, pinaagi sa Simbahan nga mao ang iyangn lawas. Mao nga dili maluwas kadto sila nga bisan nahibalo na nga ang Simbahan tinukod ni Cristo ug gikinahanglan alang sa kaluwasan, apan nagdumili lang gihapon sa pagsulod sa simbahan o pagpabilin diha kaniya. Sa samang higayon, gumikan ni Cristo ug sa iyang Simbahan, makaangkon  ug tunhayng kaluwasan kadto sila nga, dili tungod sa ilang  kaugalingong sala, wala mahibalo sa Ebanghelyo ni Cristo ug sa iyang Simbahan, apan matinud-anon nga nanagpangita sa Dios ug, tinukmod as grasya, naningkamot sa pagtuman sa iyang kabubut-on pinaagi sa mga gisugo sa ilang tanlag.

P: Ngano man nga ang Simbahan kinahanglang magmantala sa Ebanghelyo ngadto sa tibuok kalibotan?

T: Ang Simbahan kinahanglan maghimo niini tungod kay si Cristo mihatag sa mando: “Panlakaw kamo ngadto sa tanang katawhan sa tibuok kalibutan ug himoa silang akong mga tinun-an, ug bunyagi sila sa ngalan sa Amahan, ug sa Anak ug sa Espiritu Santo: (Mateo 28:19). Kining maong misyonaryong sugo sa Ginoo nagsumikad as tunhay nga gugma sa Dios nga mipadala sa iyang Anak ug sa Espiritu Santo tungod kay “buot siya nga ang tanang tawo maluwas ug mahibalo sa kamatuoran” (1Timoteo 2:4).

(Cf. Kompendiyo sa Katekismo sa Simbahang Katoliko, 170-172)