Magtutudlo Maayo Gayod nga Ania Kita Dinhi

Ikaduhang Domingo sa Kuwaresma (March 13, 2022)
Gn 15:5-12, 17-18 / Ps 27:1, 7-8, 8-9, 13-14 / Phil 3:17—4:1 / Lk 9:28b-36

Sa dihang si Pedro, si Juan ug si Santiago gidala ni Jesus sa bukid ug sa kalit lang nausab ang panagway ni Jesus ug nakigsulti kaniya si Moises ug si Elias. Kini nga kahigayonan usa ka pag-andam sa umaabot nga pagsulod ni Jesus didto sa Jerusalem aron siya taralon sa hukmanan, paantuson ug unya patyon ug ilansang sa krus. Kini nga paghulagway usa ka pagpakita nga ang paagi sa Dios sa pagpangluwas lahi gayod sa atong hunahuna ug kasinatian. Ang pamaagi sa Dios langitnon ug ang pamaagi sa tawo kalibutanon. Si San Pablo diha sa atong ikaduhang pagbasa naghisgot nga ang atong pinuy-anan dili niining maong kalibutan apan didto sa langit.

Ang pagpadayag ni Pedro sa dihang iyang nakita si Moises ug si Elias nga nakigsulti kang Jesus nalipay siya pag-ayo, gani miingon siya “magtutudlo maayo gayod nga ania kita dinhi magbuhat ako ug tulo ka payag usa alang kang Moises, usa alang kang Elias ug usa alang kanimo.” Kini nga pagpadayag ni Pedro usa ka pagpakita nga ang iyang kasinatian nga langitnon dili matukib. Ang giila nga mga balaan sa karaang panahon nakigsulti kang Jesus ug kini dili gayod basta-basta nga kasinatian. Apan ang maong panghitabo wala magpabilin didto lamang sa maong bukid kon dili gituman ni Jesus didto pinaagi sa pag-ula sa iyang kinabuhi didto sa kalbaryo sa krus.

Si Jesus ug ang mga tinun-an nanganaog sa maong bukid aron sa pagtapos sa iyang misyon didto sa krus. Kini nga paghatag sa kaugalingon usa ka makaluwas nga gugma sa Dios. Ang Dios wala magsapayan sa paghatag sa iyang Anak nganha kanato. Bisan sa kasakitan nga giantus ni Jesus siya nagmadaugon sa pagluwas sa atong mga kaugalingon; batok sa sala ug kamatayon.

Karon ang hagit kanato nga mga sumusunod ni Jesus andam ba kita sa pagsaksi sa atong pagtuo sa atong Ginoo? Dili lang ba kita kutob sa maong bukid sa kahimayaan ug sama kang Pedro nga moingon “maayo gayod nga ania kita dinhi.” Ang atong kahimayaan nagsukad diha sa pagsakripisyo ug paghatag sa atong kinabuhi sa kinatibuk-an gayod diha sa atong Ginoo. Ug pinaagi nianang maong pagsakripisyo kita makaingon nga ang atong kaluwasan anaa sa Dios nga mao ang atong kahayag ug kaluwasan. Ug ang atong Amahan nga atoa sa langit moangkon kanato nga nag-ingon “Mao kini ang pinili kong mga anak.” (Bro. Soren Abellanosa)