Pagkat-on kang Jesus

Unang Domingo sa Kuwaresma (March 6, 2022)
Deut 26:4-10 / Ps 91:1-2, 10-11, 12-13, 14-15 / Rom 10:8-13 / Luke 4:1-13

Ang unang Domingo sa Kuwaresma naghulagway sa tulo ka higayon sa pagtintal sa atong Ginoo. Human sa pagbunyag sa atong Ginoo siya gidala sa espiritu ngadto sa kamingawan sulod sa kuwarenta ka adlaw. Kini mahimo usab sa paghulagway sa atong kaugalingong panaw pinaagi sa pag-obserbar sa panahon sa kuwaresma.

Ang atong Ginoo gisulayan sa nagkalain-laing mga paagi sa pagtintal sa yawa, apan ang atong Ginoo nagmadaugon pinaagi sa lig-on niyang relasyon ngadto sa Amahan nga nagpadala kaniya. Ang tulo ka tentasyon nga nasinati sa atong Ginoo naghulagway sa tulo ka paagi nga gamiton sa yawa aron mahulog kita sa pagpakasala. Kining mga tentasyon sa atong Ginoo gipadayag kanato aron sa pagtabang kanato pagbatok niining mga nagkalain-laing klase sa paglinlang.

Ang unang tentasyon mao ang pag-aghat sa yawa ngadto kang Jesus sa paghimo sa bato ngadto sa pan. Ang yawa nasayod sa kahimtang ni Jesus nga sulod sa kuwarenta ka adlaw wala siya mokaon. Ang maong paghulagway usa ka pagpakita nga ang yawa gusto nga mosulay sa atong Ginoo pinaagi sa iyang gibati. Ang yawa maantigo kaayong mobantay sa atong panginahanglan. Gitudloan kita ni Jesus nga magbinantayon kita niining maong tentasyon tungod kay kini makahimo kanato sa pagpahilayo sa Dios. Mamahimo kitang mga arogante tungod kay nasayod kita nga aduna kitay gahon nga makahimo sa bato ngadto sa pan.

Ang ikaduha mao ang paglinlang sa yawa ngadto kang Jesus nga kon simbahon niya siya mahimong ihatag niya ang tanang gahom nga gitugyan kaniya. Kining maong tentasyon makapadani kaayo sa atong kaugalingon. Si Jesus nasayod nang daan nga kaniya lamang gitugyan ang tanang gahom ug himaya. Ang tanan nga gihanyag sa yawa kaniya usa lamang ka bakak ug kalibutanong katagbawan.

Ang katapusan mao ang pagsugo sa yawa kang Jesus sa paglukso ngadto sa kinatumyan sa templo aron sa pagsukod kon siya ba gayod ang Anak sa Dios. Ang atong Ginoo nga nasayod sa tanan ilabina ang dakong gugma sa Amahan dili na kinahanglan nga ipasigarbo ngadto sa tibuok kalibutan nga siya mao ang Anak sa Dios.

Kining maong tulo ka matang sa tentasyon nga gigamit sa yawa ngadto sa atong Ginoo dili halayo usab sa atong mga kasinatian nga mga pagtintal kanato. Atong lig-onon kanunay ang atong pagtuo, paghigugma ug paglaum ngadto lamang sa Dios tungod kay nasayod kita nga siya lamang maghatag kanato sa tinuod nga kagawasan, kaluwasan ug sa kinabuhing walay katapusan. Amen. (Bro. Soren Abellanosa)