Ika-22 ka tuig nga kapistahan sa Birhen sa Lourdes gisaulog

Luyo niining panahon sa pandemya nga nasinatian karon ang Gagmay’ng Kristohanong Katilingban (GKK) Birhen Sa Lourdes (BSL), Bacahoa, Cabantian nga nahisakop sa St. Mary of the Perpetual Rosary Parish, Buhangin, malampusong gisaulog ang ika-22 nga kapistahan duyog sa maong tema: “Ang Birhen sa Lourdes mao ang atong sumbanan sa pagtoo ug pagsalig labi na sa panahon sa pandemya”.

Ang mga GKK Servant Leaders ug miyembro sa katilingban sa BSL, Bacahoa nagpadayon gihapon sa pagpangalagad taliwala sa mga kalisud, kapit-os nga nasinatian. Kining mga butanga wala nahimong babag aron padayonon ang ilang saad sa pagpanerbisyo sa katawhan sa Ginoo.

Dinasig sa maong tema sa pagsaulog sa kapistahan sa Mahal na Birhen sa Lourdes, kini nagpaila ug nagpatin aw sa atong kahimtang karon nga kitang tanan nag antos tungod niining krisis. Gihaum usab kini sa sitwasyon karon kay tungod niining pandemya, modangop jud ang mga katawhan sa Bacahoa kay Birhen Maria sa Lourdes sa mga pag-ampo, pagsalig ug pagtoo sa walay pag duha-duha aron ang Mahal na Birhen Maria ang motabang ug ipadangat ngadto sa iyang bugtong Anak nga mao ang atong Ginoong Jesukristo ang tanan natong mga pangaliya.

Nagpahigayon og siyam ka adlaw sa pagnobena isip pagpangandam sa kasaulogan sa kapistahan diin kini aktibong giapilan ug gisuportahan sa mga miyembro niining maong katilingban. Ang Santos nga Misa sa kapistahan sa Birhen sa Lourdes, Bacahoa gipahigayon sa Pebrero 12, 2022 sa alas 6:00 ang takna sa buntag.

Ang kasamtangang situwasyon natong tanan karon mga hagit lamang diin kinahanglan natong huptan ang atong pagsalig ug pagtuo sa labaw’ng Makagagahum ug pagpalawom sa atong debosyon sa Mahal nga Inahan Birhen Maria.

Tungod sa padayon nga pagka madasigon sa mga GKK Servant Leaders ug sa pangama ni Birhen sa Lourdes, daghan ang mga naga supporta sa mga aktibidades ug proyekto sa kapilya. Busa karon nagapadayun gihapon sa paglambo ang maong katilingban tungod sa pagka madasigon sa pagpangalagad sa matag-usa sa GKK Birhen Sa Lourdes. (Marriel Siong, GKK SoCCom)