Ang Kausaban Makab-ot Kung Kita Kanunay Kang Kristo Monunot.

Ikaduhang Domingo Sa Kwaresma
Gen. 12:1-4/ Ps. 33:4-5, 18-22/ 2Tim 1:8-10/Mt.17:1-9

Ang tulo ka mga apostoles nakasaksi o nakasinati sa pagkausab sa dagway sa Ginoong Jesukristo. Kining maong kasinati-an posibli usab nga atong masinati. Duha ka pontos alang sa atong pamalandong mahitungod niini.

Una: ang pagsunod kanunay kang Kristo. Si Pedro, si Juan, ug si Santiago nahimong saksi sa maong hitabo tungod kay misunod ug miuban sila kang Kristo ngadto ibabaw sa bungtod. Sa ato usab nga pagkinabuhi nga haduol sa Ginoo kita maksinati gayod og kausaban o kabag-ohan. Kay alang kanako ang tinuod nga sumusonod ni Kristo bisan asa muadto ug bisan asa mulingi ug mutan-aw ang iyang makita mao si KRISTO, kana kung si Kristo gayod ang iyang gisunod. Kini nagpasabot nga si Kristo ang nag-una kaniya, si Kristo ang anaa kanunay sa iyang atubangan. Mao nga si Kristo ang kanunay niyang makita. Kung ang tulo ka apostoles wala pa misunod kang Kristo nakasiguro gayod ako nga wala pud sila nakasinati sa pagka-usab sa panagway sa atong Ginoo. Kini mga igsoon usa ka dakung inspirasyon alang kanato sa atong pagpadayon sa pagkinabuhing haduol sa Ginoo.

Ang ika-duhang ponto: ang pagpamati ug ang pagtuman sa iyang mga pulong. Atong nadungog diha sa Ebanghelyo si Pedro naghatag og sugyot ngato kang Kristo. Apan ang Amahan mibadlong kaniya sa pag-ingon; “kini ang pinalangga kong anak, nga akong gikahimot-an, pamati-a ninyo siya.” daw ang amahan miingon kang Pedro; “dro dili ikaw ang angay mosulti kun dili kining akong anak.” Sa laktod nga pagkasulti si Kristo ang mosulti ug si Pedro ang mamati.Sa Ebangelyo ni San Mateo nga mao ang atong Ebanghelyo karung adlaw naglawan nga si Pedro uban sa duha ka apostoles nakabati og kahadlok. Sa Ebanghelyo ni San Marcos si Pedro gilarawan nga naglobog kun unsay iyang isulti. Mao kini ang gibati ni Pedro, siguro gbati pud siyag dakung kalipay o “excitement”. Naka siguro gayod ako nga kung aduna kitay mga problema dili gayod kita mangayog tambag sa mga tawong naglibog o tawong nahadlok. Usahay usab makasinati kita niini, pananglit kung suko kaayo ta diba kasagaran magpataka nalang tag yawyaw. Gani makadaghan na akong nakadungog sa mga tawo nga moingon; “padre kanang masuko gani ko di gyod ko ka pugong sa akong baba.” ako lang pud usahay tubagon: “ mao ba, kun mao na, ‘brotherly advice’ lang, palihog ko pagtahi sa imong baba”, (hahaha). Nganung kasagaran magpataka naman lang kitag yawyaw o nganung di man kita makapugong sa atong baba o kaugalingon? Tungod kay ang atong gipamati ang atong gibati, ang atong kasuko. Apan kung si Kristo ang atong pamati-on ug tumanon adunay gayoy kausaban. Sama sa iyang giingon niadtong ika-pito ang Dimongo sa Ordinaryong panahon pipila ka Domingo ang milabay; “Higugmaa ang imong mga kaaway ug iampo ang nagpasipala kanimo.” kun ugaling kana pa ang naglanoglanog (echo) sa atomg mga hunahuna ug mga kasingkasing nakasiguro gayod ako nga adunay mahitabo nga kausaban sa matag usa kanato.

Hina-ot unta nga kitang mga sumusunod ni Kristo dili magpahilayo kaniya kun dili magpaduol kaniya sa kanunay ug magmatinumanon sa iyang mga pagtulon-an tongod kay pinaagi niini atong makab-oy ang kabag-ohan ug maka abot kita sa iyang ginghari-an.