Ako, Alay Kapwa

Ania na usab kita niining bililhong panahon sa Kwaresma. Kini ang atong panaw sa pagpangandam alang sa Pasko sa Pagkabanahaw. Magsugod sa Mierkoles sa Badlis ug molungtad hangtod sa Huwebes Santo sa buntag. Dayag kaayo nga panahon kini sa grasya alang sa katawhan sa Dios, aron mas masinati pa nato ang paghinulsol, pagpangayo’g pasaylo sa sala, ug sa pagbag-o ug pakig-uli. Unsa ang gipahigayon ug gitanyag sa Simbahan aron mahatagan kita og higayon nga masinati kining PAGBAG-O UG PAKIG-ULI.

Alay Kapwa sa mga kabus
Dugay na nga panahon nga sa matag Kwaresma ang Simbahan dinhi sa Pilipinas, nagahimo niining kampanya nga gitawag Alay Kapwa. Kampanya kini alang sa malipayong pagsangyaw sa Maayong Balita sa kaluwasan ngadto sa mga kabus pinaagi sa kakabus.
Kaniadtong 2013 Tuig sa Pagtoo, ang atong Santo Papa Benedikto XVI, nagpahinumdum kanato, nga ang pagumol sa pagtoo kinahanglan nga magbunga ngadto sa konkretong buhat sa gugma ug kalooy. Kini maoy pinaka klaro nga sukdanan sa tinuod ug hamtong nga pagtoo sa Dios. Busa dinhi sa Alay Kapwa nato mapadayag ang kahamtungan sa atong pagtoo ug paghigugma sa Dios. “Ang nahigugma sa iyang isigkatawo, anak sa Dios ug nakaila sa Dios. Ang wala mahigugma sa iyang isigkatawo wala makaila sa Dios kay ang Dios gugma man.” (1 Jn. 47-8)

Ang 2014 Mensahe sa Kwaresma sa atong Santo Papa Francisco nagpalig-on pa niining kampanya sa Alay Kapwa. Sa iyang mensahe nagpahinumdum siya sa kamatuoran nga ang pagpaubos, pagpakatawo ni Hesus ug sa iyang pagpakakabus, hangtod sa kamatayon sa krus, mao ang Iyang dalan sa kapasayloan sa sala ug sa kaluwasan. Walay laing dalan siyang gipakita. Kini ang Misteryo sa bahadianong dalan sa Diosnong kalooy ug gugma.

Mao kini ang diwa sa atong Alay Kapwa matag tuig. Tungod sa gugma sa Dios ug isigkatawo, magpaubos, magpakakabos, magsakripisyo sa kaugalingon alang sa uban. Apan, sama ni Kristo mabanhaw lang gihapon. Matud pa ni Papa Francisco, ang kakabus nga sama niini maoy tubag sa Ebanghelyo sa kahimtang sa kawad-on sa kalibutan, nga bunga lamang sa kahakog ug pagpasulabi sa kaugalingong hilig.
Halad sa Panahon
Ang Alay Kapwa dili lang limos alang sa mga hinikawan. Kinahanglan ang pagpakabana sa isigkaingon. Kinahanaglan ang pagtagad sa isigkaingon. KInahanglan ang paghunong aron tagaan og panahon ang pagtagad sa uban. Kinahanglan lantawon, hikapon, paminawon aron matagaan og saktong tubag ang tawag sa isigkaingon.

Halad sa Talento
Ang alay kapwa dili lang limos alang sa mga alaot. Dali ra ang limos. Ang alay kapwa mao ang pagpaaambit sa kamaohan, katakos, kusog, serbisyo aron mabati sa tawo ang mainiton ug malipayon nga pagduol ug pakiglambigit. Hindi kinahanglan nga talentado ang tawo aron mag alay kapwa. Igo na ang paghatag sa kaugalingon bisan unsa ang matabang alang sa kalipay ug kabulahanan sa isigkaingon.

Halad sa bahandi
Matud pa, walay kabus nga walay ikapaambit. Walay dato nga walay madawat. Ang labing mahinungdanon mao nga makiglambigit. Makahuluganon ug maluwasnon ang mohalad sa bisan unsa nga makaya ug manggihatagon nga ipaambit sa uban.

Busa, nagmanggihatagon kitang mopaambit ug magatigom sa atong mga halad sa gugma alang sa Alay Kapwa. Halad kini nga kinasingkasing, kutob sa makaya ug mahatag. Dili kini buhat lamang sa mga may kaya ngadto sa mga wala. Ni hatag kini nga kinuripot ug pinugos. Kon dili, bahandianong gasa kini gikan sa kakabus.

Ang natigom nga mga halad mao ang atong madalidali nga magamit sa panahon sa kalamidad dinhi sa atong lugar ug matampo sa laing lugar, sama niadtong nahitabo sa panahon sa Bagyo nga Pablo, Linog sa Bohol ug sa Bagyong Yolanda. Nagasalig ako nga sama sa gihapon, magmanggihatagon kaayo kita.