Ika-51 ka tuig nga kapistahan ni Sr. Sto. Niño malampusong gisaulog

Ang mga hulga sa panahon ug mga nahiaguman nga mga pagsulay dili sukaranan sa paghunong sa kaakuhan sa pagpadayon sa panaw diha sa matoohong sumusunod ni Kristo.

Gikalipay sa kinatibuk-ang katilingban sa GKK Sr. Sto. Niño, Lapanday, Tigatto sa Zona 9 diin nahisakop sa St. Mary of the Perpetual Rosary Parish, Buhangin, Davao City, ang malampuson nga pagsaulog sa Ika-51 ka tuig nga kapistahan sa atong Ginoong Hesukristo pinaagi sa batang si Sr. Sto. Niño uban sa Tema: SR. STO. NIÑO PUNO SA GUGMA, AMONG PAGLAUM UG KAHAYAG LUYO SA MGA PAGSULAY SA PANDEMYA.

Ang pagpangandam alang sa kapistahan sa Mahal na Patron gipangunahan kini sa mga GKK Servant Leaders ingon man ngadto sa mga Miyembro ug sa mga Pundok Banay Leaders, Youth Officers gikan sa unang adlaw sa Novena nga nagsugod niadtong Enero 13, 2022 hangtud kini sa ika-siyam (9) ka adlaw sa Novena-Kasaulogan, Enero 21, 2022 diin kini inubanan sa mga Pag-ampo sama sa Balaang pag Rosaryo, Angelus ug ang pag Novena sa Mahal na Patron.

Ang gipasibaw sa kapistahan mao ang pagsaulog sa Santos nga Misa niadtong Enero 22, 2022 diin gipangunahan kini sa Kura Paroko sa SMPRP, Rev. Fr. Dionisio Tabiliran nga gisugdan sa alas 9:00 ang takna sa kabuntagon. Ang maong Santos nga Misa gitambungan sa pipila ka mga bisita sa kasikbit nga mga GKK ug mga miyembro sa katilingban.

Diha sa pag-paambit ni Fr. Diony, iyang gisaysay ang mga panghitabo sa batang Hesus gikan sa iyang pagkatawo, paghatag ug pangalan, paghalad kaniya, sa ilang pagpangagiw padulong sa Ehipto ug ang pagkawala ug pagkakaplag kang Hesus, ug ang kapuno sa gugma nga diin atong masinati sa tagsa-tagsa ug grasya sa lahutay sa atong pagtoo kang Hesuskristo.

Dugang pa sa iyang pag-paambit nga diha sa atong pagkinabuhi uban sa atong pamilya ug pagpadayon sa pagpuyo nga matoohon kanunay nga atong masinati ang mga hiyas sama sa usa ka bata nga nagpakatawo nga puno sa gugma, pagka-mapaubsanon, mapasayloon, matinud-anon, dili magdumot, nga kining tanan atong mahuptan sa gingharian sa Dios diha sa pagpangalagad.

Apil sa selebrasyon, ang mga batan-on sa GKK nga gipangulohan ni PSB Daniel Sanchez nga mihimo og Virtual Contest sama sa Sinulog Dance Contest (Kids & Adults category), Poster Making Contest, Virtual Tableau Photo Liking Contest pinaagi sa siyam ka Pundok Banay. Ang pag-salmot sa maong aktibidadis ug nahimong malampuson usab.

Tungod sa hulga sa pandemya, gipatuman gayud niini sa pag implementar sa hugot ug striktong pagsunod sa health protocols.

Mapasalamaton ang mga GKK servant leaders ug mga miyembro sa Katilingban sa nahimong kalampusan sa selebrasyon tungod sa pagtinabangay sa matag-usa, uban ang mga pribadong individual, ug sa nagkalain-laing grupo sa katilingban nga migahin sa ilang panahon, talento ug bahandi alang sa mga gikinahanglan aron mag malampuson ug mabungahon ang pagsaulog sa kapistahan sa Mahal na Patron, Sr. Sto. Niño.

Dalaygon ang Dios!

VIVA PIT SENYOR!

(Arsenio Berdera, Jr., GKK SoCCom)