First Communion sa GKK – Sto. Niño, Bagahai

Gisaulog sa GKK – Sto. Niño, Bagagai , sakop sa Parokya sa Sagrada Pamilya ang ilang kapistahan niadtong Enero 18 sa alas 9:00 sa buntag. Ang misa gipanguluhan ni Fr. Roger Duhaylungsid, DCD. Kini gitambungan sa mga miyembro sa GKK lakip na ang mga deboto ni Sr. Sto. Niño sa kasikbit nga lugar.

Tungod sa padayong hulga sa Covid 19, gilimitahan ang mga aktibidad ug ang mga lihok sa mga miyembro apan wala kini nakapugong sa pagpahigayon sa First Communion sa 25 ka mga bata nga naa na sa saktong panuigong angayan na nga mukalawat. Sa kagustuhan sa mga ginikanan nga makadawat na sa sakramento ang ilang mga anak, nagplano gilayon ang mga GSLs sa pagpanguna ni Mrs. Virgie Orduña, ang PSK sa maong kapilya. Adunay pakighinabi tali ni Fr. Roger Duhaylungsod, DCD, ang kura-paroko ug sa mga GSLs. Gikauyunan nga ang First Communion ipahigayon sa kapistahan sa GKK sanglit walay face to face classes sa mga tulunghaan.

Kauban sa pagpangandam sa mga partisipante mao ang paghatag ug katesismo aron masabtan sa mga kabataan ang mahitungod sa sakramento nga ilang pangadawaton. Gihatag kini nila Crisanta Dela Cerna ang PSP ug mga kaubanang GSLs. Una gipahigayon ang Unang Kalawat, nangumpisal usab ang mga bata aron takus gayod mukalawat sa lawas ni Kristo.

Sumala sa mga GSLs sa maong katilingban, ilang nabati ang personal nilang pakiglambigit sa mga bata tungod kay sila mismo maoy muassist ug mufollow-up sa mga gikinahanglan. Nabati usab ang pagtinabangan sa mga silingan tungod kay ilang makita ang pagpangandam dili lamang sa pista apan sa apil na usab ang First Communion.

Nahimong malampusan ang selebrasyon sa kapistahan ug ang pagpahigayon sa First Communion pinaagi sa pagtinabangay sa mga miyembro sa GKK. Gikalipay pod kini pag-ayo sa mga bata lakip ang mga ginikanan sa mga First Communicants. Nagpamatuod lamang nga taliwala sa pandemya mahimong mapadayon ang mga aktibidad sa GKK pinaagi sa ensaktong pagplano ug pagsunod sa mga guideliness. (Guiseppe Cuena, GSL- Holy Family Parish, Baliok)