“Works of Mercy” sa Parokyano ni Sr. San Roque

Sa pagsaulog sa ika-500 ka tuig sa Kristyanismo dinhi sa atong nasud nga adunay temang “Gifted to Give’’, ang matag usa gihagit sa pagpaambit sa mga nakadaiyang grasya nga atong naangkon ug nadawat. Kining maong hagit gitubag sa atong mga igsuong Katekista sa Parokya ni San Roque sa Malabog pinaagi sa ilang programang “Works of Mercy” sama sa “gift giving” nga nahitabo sa Sitio Beto – usa ka GKK nga sakop sa parokya nga gidumala sa atong kaigsuonang mga Lumad ug kini nga dapit dili pa gayud kasudlan og sakyanan.

December 27, 2021 adlawng Lunes, una paman misubang ang adlaw, dungang namaktas ang usa ka gatos kapin nga mga parokyano bitbit ang mga nagkadaiyang mga gasa nga ilang itanyag sa katilingban sa San Jose- Sitio Beto.

Tumong sa maong programa ang pagpaambit sa gasa nga dala sa nagpakatawo nga Ginoo ug sa pagpadayag sa gugma pinaagi sa pagpaambit ngadto sa mga nanginahanglan hilabi na nga anaa pa kita sa ginatawag og “Christmas Season”. Tumong usab sa programa nga mapabati sa mga kaigsuonang lumad ang dakong gugma sa Ginoo ngadto sa matag usa.

Bisan paman sa kalayo, kabakilid og kalapok sa dalan, malipayon nga nagpadayon ang mga parokyano sa paglakat tungod sa tiunay nga gugma nga ilang nabati ngadto sa katawhan sa Sitio Beto. Og daw nahupay ang ang ilang gibating kakapoy sa mga matam-is nga ngisi sa katawhan nga misugat kanila. Human sila mamahuway sa pipila lamang ka mga minuto, dali nilang gisugdan ang programa. Sa pasiuna ni Bro. Junel Bustamante, pre-deacon gikan sa Parokya sa Malabog nga gipadala ni Father Arnold Balaquinto, Kura Paroko, iyang gipasabot sa tanan ang tinunay nga tumong og hinungdan sa pagbisita.

Gisugdan ang mga kalihokan pinaagi sa pag-ampo. Ug adunay mga padula sa kabataan ug ingon man usab sa mga hamtong og batan-on. Maabtikon usab nga gidumala sa Ministriya sa Batan-on ang pag lingaw-lingaw isip suporta sa mga PSP kon Pangulo sa Pagpanudlo nga maoy nanguna sa maong programa. Wala usab sila magpaulahi sa pag sayaw sa mga pipila ka mga Tiktok dance craze nga gitudlo kanila sa atong mga PSB gikan sa nagkadiyang GKK sa matag sona sa Parokya. Nanaygon usab ang mga PSP og ingon man ang mga batan-on ngadto sa mga lumulupyo sa Sitio Beto apan sa lahi kayo nga paagi, sa ilang pagpanaygon. Human nila sila giawitan og mga matam-is nga awit aron mabati sa matag usa ang diwa sa pasko, sila ang nanghatag niini og pinaskohan. Isa-isa nga gipasukod og tsinelas ang ang mga kabataan, gisul-oban og mga sinina nga naka ingon sila og “wow”. Gitunulan usab sa mga nag-unang panginahanglanon sa panimalay ang matag hamtong sama palanggana, takure, balde og grocery items, sanglit ang pinakatumong man sa maong programa mao ang pagpanghatag.

Adunay panultihun ssa Ingles nga nag-ingon “From the abundance of the heart, the mouth speaks”. Dili na namo maihap kon pipila ka pulong pasalamat ang among nadungog gikan kanila. Siguro nabati nila nga sila gihigugma og nalipay ang ilang kasing-kasing, ug kini ilang gipadayag dili lang painaagi pulong. Apan wala didto nahuman ang programa, kay kami ila man usab gidalitan og paniudto nga gisaluhan og gikabusog namong tanan.

“Dako kaayong kalipay ang among nabati tungod sa inyong tagsa-tagsa ka mga presensya ug sa mga gasa nga inyong gitanyag nganhi kanamo hinaot nga masubli pa kining among panagtapok. Merry Christmas!”, mensahe ni Piolo PSK sa San Jose-Beto. “Salamat kaayo sa mga nisuporta sa among programa. Sa mga katawhan diri sa Beto hinaot nga kamo among napalipay sa simpleng paagi, ang regalo nga among gitanyag kaninyo nagagikan sa mga taong adunay malumong kasing-kasing nga naghigugma kaninyo. Gihimo lamang kaming instrumento sa Ginoo”, mensahe ni Sis. Jennifer Aranez, coordinator sa PSP nga maoy nagdumala sa programang “Works of Mercy”. Gitapos ang programa pinaagi sa pag-ampo isip pasalamat sa Ginoo sa maong kalampusan.

Nanguli ang mga parokyano baon ang mga ngisi og tam-is nga pasalamat nga ilang nadawat. Balewala nila ang taligsik og kalapok samtang sila namauli tungod kay nahibalo man sila nga kini kabahin sa pagpangalagad sa Ginoo. Ang paghatag og kalipay sa matag-usa mao ang tinuod nga diwa sa Pasko, sa kanunay dalaygon ang Dios! (Imelda Overiz | SRP Malabog)