Karong Adlawa Natuman Kining Kasulatan

4th Sunday in Ordinary Time
Jer 1:4-5, 17-19 / Ps 71:1-2, 3-4, 5-6, 15-17 / 1 Cor 12:31-13:13 Or 1 Cor 13:4-13 / Lk 4:21-30

Ang atong mga pagbasa karon nagpunting mahitungod sa pagsangyaw ni Jesus kabahin sa Gingharian sa Langit ug uban niini mao ang pagpang-ayo sa mga masakiton, pagpalayas sa mga yawa, ug pagpasaylo sa sala. Kini nga mga buhat ni Jesus nadungog kaayo sa iyang mga katagi-lungsod. Sa pag-abot ni Jesus didto sa iyang yutang natawhan siya misangyaw sa maayong balita ug mikutlo sa basahon ni Propeta Isaias nga nag-ingon: “Karong adlawa natuman kining maong kasulatan diha sa inyong pagpaminaw.” Tinood ang pagsangyaw ni Jesus sa Pulong sa Dios dayag kaayu tungod kay inubanan man kini diha sa paghimo ug mga milagro sama sa pagpang-ayo sa mga maskiton, pagpahawa sa daotang espiritu. Apan ngano kaha nga ang iyang mga katagi-lunglungsod wala man modawat sa iyang mensahe?

Kining maong panguta mao usab ang atong ipangutana diha sa atong tagsa-tagsa ka mga kaugalingon. Ang ato bang pagsunod sa atong Ginoo pinaagi sa atong mga debosyon, naghatod ba sa atong pagpalawom sa pag-ila kaniya? Kining maong pangutana dili nato matubag kon dili nato susihon ang atong tagsa-tagsa ka kaugalingon diha gayod sa pagpaminaw sa atong kahiladman sa atong kaugalingon.

Diha sa atong ikaduhang pagbasa sa sulat ni San Pablo diin iyang gipadayag nga kinahanglan nga sa tanan natong mga gipangbuhat aduna gayoy gugma nga nag-uban niini. Ang gugma dili lamang kini usa ka emosyon nga kasagaran atong madungog nga ihatag nga deskripsiyon. Apan ang gugma usa ka kombiksiyon nga mapadayag nganha sa mga maayung buhat ug nakasukad diha sa dakong gugma sa Dios nganha kanato.

Apan unsaon man nato kini pagpakita, kining maong gugma nga gihisgotan ug gihulagway ni San Pablo? Gani ang atong Ginoo nagpadayag sa iyang pagkadismaya sa katawhan didto sa iyang kaugalingong lungsod. Tungod kay ang ilang nadungog kabahin kaniya wala man giubanan sa gugma sa dihang ila nang gikahimat Siya. Nagpasulabi man ang ilang pagtamay kaniya sa ilang pag-ingon “Dili ba anak man kini siya ni Jose?” Ang ilang pag-ila kang Jesus diha lamang kutob sa kon unsa ang ilang nakita ug nadungog kabahin kaniya, wala kini mituhop ngadto sa pag-ila sa presensya sa Dios nga diha uban kanila. Kini nga reyalidad dili halayo diha usab kanato sa atong kasinatian nga basin ang nagpasulabi diha kanato mao na, kon unsa ang atong makita ug madungog ug nagpasulabi na atong “bilib” sa atong kaugalingon ug hangtod nga dili na kita maantigong maminaw sa atong palibot nga diin ang tingog sa Dios ato usab nga mabatian. (Bro. Soren Abellanosa)