Residents in Bohol flock to a truck as a soldier hands water bottles and food items on Sunday, December 19, 2021. Typhoon Odette caused devastation in Bohol, and supplies are running low. (Ian Cruz)
ASAC-Davao Manguna Sa Tabang Alang sa Biktima Sa Bagyo “Odette”
Gitahasan ni Arsobispo Romulo G. Valles, D.D., Arsobispo sa Arkdyosis sa Davao ang Archdiiocesan Socail Action Center (ASAC) sa Arkidyosis nga manguna sa pag-organisa ug pagpahigayon sa tabang alang sa mga biktima sa bagyo “Odette”.
Kahinumdoman nga niadtong Disyembre 18, 2021, mipagula og sulat-sirkular si Arsobispo Valles aron ipahibalo sa mga parokya ang “special second collection” sa tanang mga Misa sa Disyembre 23 alang niining maong katuyoan.
Mamahimo usab nga ideposito ang tabang sa BDO Davao, Woodlane Diversion Road,sa Account Name nga The Roman Catholic Bishop of Davao, Inc., sa Account number nga 010470013680 nga saving account. Mamahimo usab ihatag ang inyong donasyon sa buhatan sa panudlanan sa Arkidyosis didto sa Archbishop’s Residence, 247 F. Torres Street, Davao City o kaha sa pinakaduol nga parokya.
Sa tigom nga gitimonan ni Fr. Leonardo Dublan, Jr., Director sa ASAC-Davao, uban sa mga nagkalain-laing ahensiya sa Arkidyosis, sama sa Davao Association of Catholic Schools, University of the Immaculate Conception, Holy Cross of Davao College ug Archdiocesan Commission on Social Communications sa Arkidyosis sa Davao, niadtong Disyembre 20, 2021, gikauyonan nga ang San Pablo Parish sa Juna Subdivision maoy sentro diin tiguoman ang mga tabang.
Lakip niining maong “wish list” ang bugas, pagkaon nga dili dayon madaot sama sa bulad ug monggos, mga gamit sa kusina sama sa kaldero, kutsara ug plato, mga gamit pantulog sama sa habol, ug uban pa ang nakita nga gikinahanglan. Gipaskil kining maong mga gikinahalanglan sa social media aron masayran usab sa kadaghanan gawas sa pagsibya sa DXGN 89.9 Spririt FM-Davao.
Gidili lamang ang pagpadala og “used clothing’ ug mga bottled mineral water.
Gipanghinaot nga makatabang ang Arkidyosis sa mga lokal nga Simbahan nga apektado sa Visayas ug Mindanao. Gilauman usab nga makatabang ang mga pribadong sektors alang sa maong tinguha sa pagtabang. Wala pay gitakda nga adlaw kanus-a mahatod kining matigom nga mga hinabang. (DCH)
No Comments