Kapistahan sa Birhen sa Guadalupe Malipayong Gisaulog

Malipayon nga gisaulog sa mga GKK nga nahisakop sa sona uno sa St. Mary of the Perpetual Rosary ang ika-lima nga kapistahan sa Mahal nga Birhen sa Guadalupe nga patrona sa maong sona sa Disyembre 11, 2021. Ang sona uno gilangkuban sa upat ka mga GKK nga mao ang Santa Teresita, Green Orchard Village, San Vicente Ferrer, Ramon Nena2, Saint Joseph the Worker, D’Achievers ug San Agustin, Forestal.

Agig pag pangandam sa kapistahan nagpa higayon og siyam ka adlaw nga novena sa triduum nga pamaagi. Sa adlaw’ng besperas gipahigayon ang prosesyon diin gitambungan sa mga katilingban sa tibook sona.

Ang Birhen sa Guadalupe maoy napili nga patrona sa mga GKK sa sona uno tungod sa iyang mga hiyas nga pagka maloloy-on ug dalangpanan sa tanan bisan pa man sa among mga kasalanan. Siya maoy nahimong inspirasyon ilabina niining panahon sa pandemya o katalagman nga nasinati karon sa tibuok kalibutan.

Ang tema nagkanayon: “Birhen sa Guadalupe, maloloy- on nga inahan ug dalangpanan sa mga kalisdanan ug katalagman sa tanang panahon”. O Mahal nga Birhen sa Guadalupe maoy gisaligan sa katawhan ug magtatabang bisan paman sa makadaghan nga kalapasan diha sa atubangan sa Dios, sa kanunay ang imong katawhan naga dangop sa mahal nga birhen kay siya lamang ang adunay katakus sa pagtabang kanamo ngadto sa imong bugtong anak nga si Jesukristo.

Ang Santos nga Misa gisaulog sa Sabado, Disyembre 11, 2021 sa alas 8:00 sa buntag nga gipangulohan sa Kura Paroko, Fr. Dionisio Tabiliran ug gipahigayon kini sa Green Orchard Village Gym diin ang host chapel mao ang Santa Teresita, Green Orchard. (Marlita Daro, GKK SoCCom)