Sagrada Pamilya, Inspirasyon sa Matag Banay

Feast of the Holy Family (December 26, 2021)
Sirach 3:2-6, 12-14 Or 1 Samuel 1:20-22, 24-28 / Psalms 128:1-2, 3, 4-5 Or Psalms 84:2-3, 5-6, 9-10 / Colossians 3:12-21 Or Colossians 3:12-17 or 1 John 3:1-2, 21-24 / Luke 2:41-52

Kadaghanang mga pamilya sa panahon sa pandemia nagpaambit nga nakasinati sila ug panaghiusang pag-ampo sa rosaryo. Kini tungod kaha kay nahadlok sila sa pandemia o unsay mahitabo nga dautan kanila? Apan sa milabay nga mga tuig, nadungan usab nato nga dili na uso ang pag-ampo nga nagkahiusa sa pamilya. Kini tungod, matud pa sa kadaghanang akong gipangutana, tungod sa dili pagka-igo sa panahon; tungod sa trabaho; tungod kay ang pagtuon sa mga bata, dili pareho ug oras ug uban pa.

Apan dili usab ikalimod nga daghan ang nagkahiusa sa pag-ampo, sama sa uban nga mga ginikanan nga iponon ang tanang mga anak aron sa pagbasa sa Pulong sa Dios, o paghimo ug mga pagpaambit sa ilang napamalandongan nga Pulong sa Dios, pag-ampo sa rosaryo, pag-ampo alang sa mga minatay ug uban pa.

Kining matang nga pamilya, nga nagkahiusa sa pag-ampo, kasagaran mao usab ang pamilya nga nagkahiusa sa pag-apil sa Santos nga Misa matag Domingo o moapil sa paggamit sa mga Sakramento sama sa Sakramento sa Pakighiuli. Alang kanila, mao kining mga buluhaton ang maghatag kanila sa kusog, kahapsay, kahiusahan ug kalipay sa panimalay.

Sila usab nahimong inspirasyon sa GKK (Gagmay’ng Kristohanong Katilingban) ug sa parokya. Ang panaghiusa sa pamilya diha sa pag-ampo, diin ang Inahan, Amahan, ug ang mga anak nakaamgo nga sila adunay usa ka Amahan nga mao ang Dios.

Ang pamilya nga kanunay mag-bag-o matag adlaw sa ilang panaad sa Ginoo, walay panahon sa panag-away nga walay katapusan, pagselosay, pagluibay sa usag-usa, pagbinayloay ug mga masakit nga pulong ug uban pa. Kana nga pamilya mao ang malipayon ug Balaang Pamilya. Ang pamilya nga kanunay nagkahiusa sa pag-ampo mao ang”gagmayng mga Simbahan”. Panghinaut sa atong Ebanghelyo karong adlawa nga modaghan unta ang mga pamilya nga mosunod sa pagsaksi sa pamilya ni Jose, Maria ug Jesus.

Kon sila na ang sumbanan sa atong mga pamilya, mao na usab kini ang pagsugod sa pagbag-o sa atong katilingban, tungod kay makatuon kita sa pagtahud, pagtinabangay, pagbansay sa pasensya o pailob, sa katarung, makat-on kita sa paghigugma sa usag-usa. Ang pamilya nga adunay Dios sa balay, maadunay kalinaw. Mao kana ang Balaang Pamilya didto sa Nazareth. Ang atong pagsaulog matag tuig niining kapistahan sa Balaang Pamilya, nag-imbita ug nagpadasig kanato sa paghimo sa atong pamilya karon nga mamahimong pamilya ni Jose, Maria ug Jesus- puluy-anan nga puno sa gugma sa Dios ug sa isigkatawo; panimalay diin masinati ang Dios. Hinumdoman nato nga nagpakatawo ang Dios ug siya uban kanunay kanato. Himoang Balaan ang inyong pamilya pinaagi sa Pagdebosyon sa Sagrada Pamilya.