Makapahiubos apan gisaaran nga maluwas

Malipayon nga gisaulog ang ika-62 nga kapistahan sa Parokya sa Immaculada Conception sa Mintal niadtong Disyembre 8, 2021.

Matod ni ni Most Rev. Romulo G. Valles, D.D., Arsobispo sa Davao, nga maoy ngangulo sa Santos nga Misa, ikatulo na niyang Misa kadto human sa St. Joseph Parish sa Sasa sa pagtak-op sa Tuig ni San Jose ug sa Immaculate Conception Parish sa Penaplata atol usab sa ilang pyesta.

Giawhag ni Arsobispo Valles nga sa mga tigom sama niini, ang Dios mismo nakigsulti sa mga tawo. Mao nga angay gayod nga balikan ug pamalandongan ang Balaang Kasulatan. “In an assembly like this, the Lord speaks to us in the Scriptures,” matod pa ni Arsobispo Valles.

Gisilsil ni Arsobispo Valles ang dakong gugma ug plano sa Dios sa pagluwas sa napukan nga tawo. “Makapahiubos ang gibuhat sa unang tawo, Adan ug Eva nga daw mibati nga mas “bright” pa kaysa Dios mao nga nakabuhat sa sala, apan wala mobiya ang Ginoo. Gani nagplano Siya sa kaluwasan sa tawo,” saysay ni Arsobispo Valles sa iyang homiliya.

Sa atong kinabuhi karon, siya nagpahimangno nga usahay murag mas “bright” pa kita kaysa Dios, ilabina diha sa mga butang nga mas nakapahilayo kanato sa Ginoo. Murag mas maantigo pa kita kung maghisgot na og abortion ug uban pang mga binuang sa tawo. Apan nalimot kita nga mosalig ug modangop kaniya.

Doble ang pyesta niadtong adlawa sa duha ka importanteng mga nilalang diha sa Kasulatan, ang mga ginikanan ni Hesus, atong Manunubos. “Karon, pyesta ni Birhen Maria, Immaculada Conception, ug pyesta pud ni San Jose. Kanindot, mga ginikanan ni Hesus,” ingon ni Arsobispo Valles.

Dako ang kalipay ug pasalamat sa mga parokyano sa maong parokya nga pinangulohan ni Fr. Johny Autida, Kura Paroko. Gani, gikan niining maong Parokya, bag-o pa lamang nasiak ang natukod nga Parokya ni San Pedro Poveda sa milabay nga Disyembre 3 niining tuiga. Pamatuod kini nga milambo gayod ang pagtoo sa katawhan isip bunga sa atong pagka-Kristiyano dinhi sa Pilipinas 500 katuig na ang milabay. (DCHerald)