Taliwala sa mga pagsulay kapistahan sa Immaculada Concepcion gisaulog

Taliwala sa mga pagsulay nga nasinatian sa pandemya, ang GKK IMMACULADA CONCEPCION sa Zone 7 nga nahisakop sa St. Mary of the Perpetual Rosary Parish, malipayong nagsaulog sa ika- 27th ka tuig nga kapistahan niadtong Disyembre 8, 2021 nga adunay Tema: “BIRHEN MARIA, SUMBANAN sa KATAWHAN, PUNO sa GUGMA ug ang PAGKAMANGGIHATAGON sa KAUGALINGON NGADTO sa UBAN.”

Ang pagpangandam alang sa mabulukon nga pagsaulog sa kapistahan, gisugdan sa siyam ka gabii HP NOVENA. Nagsugod kini sa November 29 hangtud sa December 7, 2021. Nagpahigayon og pag-ampo sa Santos nga Rosaryo sa alas 6:00 sa gabii sa dili pa magsugod ang HP NOVENA sa alas 7:30 sa gabii.

Ang matag Cluster nga gilangkuban sa siyam ka grupo maoy gitahasan matag gabii sa HP NOVENA, diin sila ang nangandam sa kasaulogan sama sa pagbasa, paglimpyo, ug paghalad og mga bulak alang sa Mahal nga BIRHEN MARIA ngadto sa altar. Nagpahigayon usab og prosesyon ang Mahal nga Imahe sa among Patron Immaculada Concepcion sa bisperas niadtong December 7, 2021 sa alas 4:00 sa kaadlawon. Gihimo kini palibot sa tibuok katilingban sa Lower Bread Village, Buhangin. Nagsindi og kandila ang matag balay nga maagian sa maong prosesyon.

Ang Santos nga Misa napahigayon niadtong December 8, 2021 sa alas 6:00 sa buntag nga gipangulohan ni Fr. Boy Roland T. Ong.

Tungod sa mga restriksyon ug pagsunod sa mga protocols, paglikay sa pandemya, walay mga social nga kalihukan ug mga padula sa maong adlaw sa kapistahan.

Bisan pa niining panahon sa pandemya ang mga GKK Servant Leaders ug mga miyembro, mainiton gihapon nga nangalagad sa katilingban. Ug uban pang mga kalihukan ngadto sa kinadak-ang simbahan sa St. Mary of the Perpetual Rosary Parish. Malipayong nagsaulog sa sinimanang Hiniusang Pag-ampo ug paghalad sa Santos nga Rosaryo kada Sabado sa gabii.

Ang pagkamanggihatagon sa panahon, sa kaugalingon, ug pagkamahigugmaon maoy mga hiyas sa Mahal na Birhen nga nahimong sumbanan sa mga pangulo ug miyembro sa katilingban sa IMMACULADA CONCEPCION. (Amelita Teh, GKK SoCCom)

VIVA MARIA! VIVA JESUS!