Gisuklian og kamaayo

Dear KNOT,

Ang akong kinabuhi isip usa ka pamilyadong tao, maka ingon ko nga colorful, ako usa ka young parent. 28 anyos ug dunay anak nga lalaki nga nagpangidaron ug 5 anyos. 3 mi ka managsoon. Duha mi ka babae ug usa ka lalaki unya ako ang eldest. Anaa ako sa puder sa akong mga ginikanan. Luag ang among ginikanan kanamo. Tugutan mi nga kung asa kami muadto basta mananghid lang kung asa padulong ug basta muuli sa tamang oras. Bisan sa pag-pakig-relasyon open ang among ginikanan basta nasayod sila niini.

Milapas ako ug naabuso ang ilang pag-salig. Naburos ako sa tinuyuan. Nag desisyon kami nga magpakasal sa akong BF ug sa walay pagduha-duha misugot siya apan hilaw pa ug pre-mature ang among pagminyu kay medyo anaa pa kami sa young adulthood nga stage.

Nakasal kami sa huwes hinuon suportado kami sa among tagsa-tagsa ka mga ginikanan. Akong nabati ang kaulaw tungod taliwala sa mga panghitabo ilang gipakita ang kamaayo ug gugma nganha kanamo nga kung sumahon dapat gisalikway mi nila o di ba kaha grabe ang kasaba nga among dangatan apan sukwahi niini ang tanan.

Dako ang among pasalamat nga taliwala sa mali nga among nabuhat gisuklian ug kamaayo sa among mga gninikanan. Kaluoy sa Dios nagpadayon nga malipayun ang among pamilya.

Daghang Salamat
Chelle

* * * * * *

Dear Chelle,

Salamat sa Ginoo, lubos ang suporta sa inyong tagsa tagsa ka mga ginikanan. Daku kaayo kini nga tabang sa inyong kahimtang isip mga batan-on pa kaayo nga nasabak sa dakung responsibilidad. Hinuon bisag suko kaayo ang mga ginikanan nga wala sa plano ang mga panghitabo, dawaton na lang kay naa naman kana. Kasagaran mahupaw ang kasuko labi na kung makita na ang apo!

Tungod niIni, mapilitan gyud mong makat-on sa mga responsibilidad isip bag-ong mga ginikanan. Matud pa, “experience is the best teacher” mao nga makakat-on gyud kamong atubangon ang mga responsibilidad sa usa ka inahan ug amahan. Ang matag adlaw usa ka higayon sa pag-adjust sa inyong bag-ong katungdanan sa kinabuhi. Panahon na sa pag move on sa imohang gibati nga kaulaw ug pulihan kini sa pagpaningkamot nga mamahimo kamong maayong mga ginikanan sa inyong mga anak. Aron makabawi, hinaut pa unta nga ang inyong kaugalingong pamilya molambo, ug sumbanan kini ang Sagradong Pamilya ni Jesus, Maria ug Jose, nga naay hugot nga gugma ug kahapsay.

Mas mayo gyud unta nga moabot ang panahon nga magbukod na kamo sa pagpuyo aron mahimo kamong independent ug makat-on pud mong mobarog sa kaugalingong paningkamot nga atubangon ang mga hagit sa kinabuhing minyo. Dalahon ninyo ang tanang nakat-unan sa tamang pagdisiplina sa inyong mga anak. Siguraduhon nga balanse ang paka istrikto ug ang pagkaluwag sa mga kagustuhan nila aron dili na mahitabo ang mga sayop nga inyong nabuhat sa inyong panahon. Nagatuo ako nga kamong magtiayon mas maayong mga ginikanan sumala sa inyong mga nakat-unan kung ano ang resulta sa sobrang maluwag sa mga anak. Kasamtangan nga mga bata pa sila, tudluan sila sa mga basic life skills ilabi na ang pagbuhat ug desisyon kay mao kini ang magdala sa ilaha sa kaayuhan o sa kadautan.

Tudluan sila sa maayong pamatasan, paano mahimong responsible sa ilahang mga desisyon sa kinabuhi, etc. Teach them to say NO even to some good things so that it would be easier for them to say NO to bad things. Teach them restraint and good judgment.

Ang tanan grasya gikan sa Ginoo. Hinaut unta nga sa inyong paglawig sa kinabuhing minyo, dahon ninyo ang inyohang tibuok pamilya nga maduol sa Ginoo. Molambo unta ang inyohang kinabuhing mainampuon, sentro niini ang Ginoo. Atong iampo nga daghan pa ang mga grasya magdagayday sa inyong pamilya ilabi na kung kamong mag-asawa makabaton sa Sakramento sa Kaminyoon o Kasal sa Simbahan.

God bless you more.
Ate Emz