Parokya sa Penaplata, 69 ka kapistahan na

Gipangulohan sa halangdong Arsobispo sa Davao, Most Rev. Romulo G. Valles, D.D., ang misa sa ika-69 nga kapistahan sa Parokya sa Immaculada Conception sa Penaplata, IGACOS niadtong Disyembre 8, 2021.

Sa iyang homiliya, gidasig ni Arsobispo Valles ang katawhan sa pagsalig sa grasya sa Ginoo diha sa iyang mahigugmaong plano sa pagluwas sa iyang katawhan. “Samtang nangandam kita sa pagsaulog sa Pasko sa Pagkatawo sa Ginoo, inahan pa lang sa Manunubos giandam na sa Dios Amahan diha sa iyang plano ang pagkawalay buling sa inahan nga si Maria,” matod pa ni Arsobispo Valles. Walay itom sa sala ang nakadulot sa pagkatawo ni Maria nga giluwas nang daan sa Amahan.

Sayod ang Arsobispo sa kalisod sa panahon karon diin pipila kanato mamahimng matintal sa pagbuhat sa sala kay sayon man kining buhaton. Apan iyang gipasabot nga subli natong mabati nga gipaila sa Amahan nga pinaagi sa Mahal nga Inahan, Birhen Maria ang pagsalig sa Dios nga mamahimong instrumento sa kaluwasan.

Gani, atol niadtong adlawa usab ang pagtapos sa Tuig ni San Jose. Gibatbat usab ni Arsobispo Valles nga si San Jose “manggiulawaon diha sa Bibliya apan gisaligan sa Dios kay siya putli og kasing-kasing.” Kini hagit sa matag usa nga bisan sa atong pagkaubos, mamahimong kasaligan kita sa Dios diha sa atong paglikay sa sala ug pagbuhat kanunay sa maayo.

Gipamalandongan sa mga parokyano uban sa ilang Kura Paroko nga si Fr. Rommel Banilad ang tema nga “Ang mabuligong kauban ni Maria kang Jose: Maayong panig-ingnan sa buhi sa pagkakabahin sa synodal nga Simbahan.” (DCH)