Simbahang Katoliko

P: Katoliko ba ang partikular nga Simbahan?

T: Ang matag partikular nga Simbahan (sa ato pa,diyosesis o eparkiya)

katoliko. Gilangkob kini sa usa ka katilingban sa mga Kristiyano nga anaay pagkahiusa sa pagtoo ug sa mga sakramento uban sa ilang Obispo, nga gi-ordinahan subay sa apostolikanhong kutay, ingon man uban sa Simbahan sa Roma “nga nagadumala sa gugma” (San Ignacio sa Antioquia).

P:  Kinsa man ang nahisakop sa Simbahang Katoliko?

T: Ang  tanang mga tawo sa nagkadaiyang mga pamaagi nahisakop o gitawag ngadto sa Katolikong kahiusahan sa katawhan sa Dios. Hingpit nga nahisakop sa Simbahang Katoliko mao kadto sila nga, nagahupot sa Espiritu ni Cristo, nahidugtong ngadto sa Simbahan pinaagi sa mga bugkos sa pagpadayag sa pagtoo, mga sakramento, simbahanong pagpangdumala ug pagkahiusa. Ang mga binunyagan nga wala makatagamtam sa hingpit nga Katolikong kahiusahan anaa gihapon nianang pagkahiusa bisan dili hingpit uban sa Simbahang Katoliko.

P: Unsa man ang kalambigitan sa Simbahang Katoliko uban sa mga Judiyo?

T: Ang Simbahang Katoliko miila sa talagsaongn kadugtongan uban sa mga Judiyo tungod sa kamatuoran nga ang Dios mipili kanila una sa tanang katawhan sa pagdawat sa iyang Pulong. Ilaha sa mga Judiyo “ang pagkaanak, ang himaya, ang mga kasabotan, ang pagtugyan sa balaod, ang pagsimba, ang mga saad, ug ang mga patriyarka; sa ilang kaliwatan natawo si Cristo (Roma 9:4, 5). Lahi sa ubang mga dili-Kristohanon nga relihiyon, ang tinuohan sa mga Judiyo usa na ka tubag ngadto sa pagpadayag sa Dios diha sa Karaang Kasabotan.

(Cf. Kompendiyo sa Katekismo sa Simbahang Katoliko, 167-169)