Unang Dominggo sa Kwaresma

March 9, 2014
Gen. 2:7-9/3:1-7; Ps.51:3-17; Rom. 5:12-19;
Mt. 4:1-11

Karong adlawa, nagsugod kita sa liturhiyanhong panahon sa Kwaresma. Kini mao ang atong pagpangandam alang sa mga pag antos ug kamatayon ni Hesus alang kanato. Ang una ug ikaduhang pagbasa naghatag kanato sa mga hinungdan ngano nga ang pag-antos ug kamatayon ni Hesus alang sa atong kaluwasan kinahanglan gayod nga mahitabo. Ang Ebanghelyo usab nagtudlo kanato sa tukma nga pagtubag sa pagkamalahutayon sa pagtoo sama ni Hesus batok sa mga pagsulay sa yawa ug sa kalibutan.

Ang unang pagbasa nagsaysay kanato sa kahingpit sa paraiso apan bisan pa niini, dili diay kini kasiguruhan nga ang tawo dili mapakyas sa pagsunod sa kabubut-on sa Diyos. Tungod sa gugma sa Diyos, gihatagan gayod kita sa kahingpitan sa kagawasan nga posible gani nga Siya atong pilion o isalikway. Matod pa ni Beato Papa Juan Pablo II, ang tinuod nga kagawasan dili sa pagbuhat sa atong gusto kundili sa pagbaton hinuon sa katungod sa pagbuhat ug unsay angay natong buhaton. Ang tawo nakasala tungod kay iyang gipili ang unsay iyang gusto. Buot siyang mahimong mag iyaiya na lang ug dili mosalig sa Ginoo. Mao kini ang mahitabo kanato kung dili nato paapilon ug isalikway ang Ginoo diha sa atong kinabuhi. Mao kini ang gisimbolohan sa bitin, ang pagkahimulag nato sa Diyos ug pagpili sa atong gusto. Dili kabubut-on sa Diyos nga isipon nato nga ang Iyang balaod mao ang pagpakunhod ug paglimita sa atong kagawasan. Hinuon, kini mao ang pamaagi sa Ginoo aron mas gawasnon kita ug dili nato gun-obon ang atong kinabuhi pinaagi sa dalan sa kamatayon nga gipadayag sa atong mga bisyo, mga hiwing pagbati ug korapsiyon. Dawaton nato nga kita mga ilaronon sa Yawa tungod kay may limitasyon ang atong kahibalo ug maimpluwensiya ang atong mga desisyon sa atong mga kapritso ug mailad kita nga ang maayo mahimong dautan ug ang dautan mahimo na hinuong maayo alang kanato. Mao nga kinahanglang modangop gayod kita sa Diyos! Kinahanglan gayod nga ang Diyos magpakatawo diha kang Hesus aron pagluwas kanato ug mahibalik kita sa pagka mga anak sa Diyos ug madawat usab nato ang gisaad nga kinabuhing walay katapusan pinaagi sa Iyang pagpasakit, kamatayon, ug pagkabanhaw bugti sa atong kasal anan.

Diha sa ikaduhang pagbasa gipadayag ang kalainan taliwala ni Kristo ug ni Adan. Si Adan gusto nga mamahimong diyos sa maayo ug dautan nga maoy nahimong hinungdan sa kamatayon. Si Kristo sa laing bahin, midawat sa Iyang pagsalig sa Iyang Langitnong Amahan nga pinaagi niini, nahimo nga dalan sa Kinabuhi. Sa ato pa, kay kita nagpakasala man sama ni Adan, nagkinahanglan usab kita sa pagsunod sa dalan nga gilatid ni Kristo kay siya man ang dalan, kamatuoran ug kinabuhi (Jn 14:6).

Ang Ebanghelyo nagsaysay kanato giunsa pagbatok ni Hesus ang mga tentasyon sa yawa ug sa kalibutan nga maoy mag-ilad kanato palayo sa Ginoo. Nan, si Hesus gayod ang atong sumbanan sa maong pakigbatok aron kanunay kita haduol sa Diyos. Ang unang tentasyon sa paghimo sa bato nga pan aron pagtambal sa kagutom ni Hesus mao ang usa ka tentasyon usab nato sa paggamit sa mga butang langitnon aron pag-alagad lamang sa atong tawhanong panginahanglan sama nga ang usa ka tawo moalagad sa Simbahan alang lamang mahimong inila ug dili sa tinuod nga paghigugma sa Diyos ug sa Iyang katawhan. Sa pagbatok niini, mosalig kita sa Pulong sa Diyos. Sama kang Hesus, magpabilin kitang matuohon, magpabiling katawhan sa Diyos, asin ug kahayag sa kalibutan (Mt. 5:13-14). Kung mosunod kita kang Hesus, atong hikalimtan ang kaugalingon (Mt 16:24). And Diyos lamang ug ang Iyang  kabubut-on ang pinakabililhon. Ang ikaduhang tentasyon sa pagpaambak ni Hesus sa kinatas-ang bahin sa templo kay sal-on siya sa mga angheles, mao ang pagpadali sa kaluwasan ug dili na ang dalan sa krus kay motuo na man ang mga tawo sa milagro. Mora na lamang ug circus nga magsige na lang ug ambak ug salo ang mga anghel aron motuo ang katawhan. Mao kini ang pagpangita sa kalampusan nga kalibutan-on, pagsalig lamang sa kaugalingon ug dili sa Diyos. Kita nga katawhan sa Diyos angayan nga mogakos sa atong krus tungod kay nahigugma usab kita ug dili nato pangitaon lamang ang kalibutan-ong kalampusan kundili ang pagkamabungahon. Ang ikatulong tentasyon sa pagtanyag sa yawa nga ihatag niya ang tanan basta mosimba si Hesus kaniya mao ang tentasyon sa garbo sa kinabuhi, ang kauhaw sa gahum, ug ang pagdominar sa uban. Kang Hesus, and Iyang kusog dili ang garbo kundili ang Iyang pagpaubos. Ang Iyang hinagiban mao ang krus sa gugma ug dili ang gahum sa kalibutan.

Sa ato pa, nagkinahanglan gayod kitag Diyos sa atong kinabuhi nga maoy moluwas, mogiya, ug mohatag ug grasya aron kita mamahimong tinuod Niyang katawhan ug mamahimong takos sa Iyang gisaad nga kahimayaan sa langit. isip kita mga katawhan nga iya sa Diyos, parianon ug balaan nga nasod (Ex: 19:5ff).