Pakig-uban sa Panaw, Gihatagan og Duot sa Ika-11 ka Tuig sa SOS

Sugod sa bulan sa Nobyembre, gipahigayon na sa Parokya sa Ascension of the Lord ang mga konsultasyon sa nagkalain-laing sektor sa katilingban alang sa pre-synodal nga kalihukan alang sa Synod of Bishops sa tuig 2023 ug isip pakig-uban sa panaw alang sa kasaulogan sa ika-11 ka tuig sa kamugnaan sa Spirituality of Stewardship kon SOS.

Gisugdan ang maong programa sa parokya sa tuig 2010 isip tubag sa panawagan sa Katolikong simbahan pinaagi sa Socio-Pastoral Institute kinsa mihatag sa seminar alang sa clerigo sa Davao niadtong Mayo 18, 2010. Ang SPI inubanan ni Fr. Ramon Aldana, SDB, kura paroko sa St. Dominic Savio Parish sa Mandaluyong City miopaambit sa iyang kasinatian ug nag-unang pundasyon sa Spirituality of Stewardship. Nahimong tigpasayon sa us aka adlaw nga aktibidad mao sila Bishop George Rimando, DD ug Rev. Fr. Leonardo Dublan , kura paroko sa Ascension of the Lord Parish.

Gihimuan gilayon ug pamaagi sa ALP ang pagpahigayon sa mga seminar ngadto sa mga Gagmayng Kristohanong katilingban (GKK) diin gipasabot ang 5 ka mga core values sa Identity (Ilahanan), Pagsalig (Trust), Pagka-mapasalamaton (Gratitude) ug Gugma (Love).

Kauban sa maong core values gibahin sa 7 ka mga areas ang mamahimong ipaanad sa mga piniyalan: pagtoo (faith); pag-alagad (service); bokasyon (vocation); GKK (BEC); Family and Life; ekolohiya (ecology); ug temporalities.

Nitubo ug milambo ang mga GKK pinaagi sa pag-renew matag tuig sa ilang pagtahan sa kaugalingon nga magkinabuhi isip usa ka piniyalan.

Niadtong tuig 2018, sa dihang milingkod ang bag-ong kura paroko nga si Rev. Fr. Zenon B. Ampong, gidawat usab niya ang maong programa ug gihimo kini nga “overarching” kon malangkobon nga matang sa kinabuhi sa tanang mga GKK, ingon man sa tanang mga ministriya sa ALP.

Ning tuiga, tema sa ika-11 ka tuig nga kasaulogan mao ang: STEWARDSHIP, A WAY OF LIFE TOWARDS JOURNEYING TOGETHER IN LISTENING AND DISCERNMENT, nga gipahaom sa gipahigayon nga mga konsultasyon alang sa Synod of Bishops.

Bisan sa pagpadagan karon sa Pundok Banay Advent Celebration (PBAC) sa 37 ka mga GKK, gi-apil sulod sa kalihukan ug konsultasyon tali sa mga misalmot nga sakop sa pundok banay ug ipaambit ang ilang mga kasinatian ug panghunahuna kabahin sa simbahan ug misyon sa simbahan.

Taliwala sa kwarentinas ug mga paghigpit tungod sa paglikay sa pagkuyanap sa coronavirus, padayon nga naningkamot ang matag GKK nga mapahigayon ang pagtahan ug usab sa mga piniyalan aron padayong magmalig-on ug mapadayonon ang panaw sa matag usa ka sakop sa katilingban sa piniyalan .

Isip timaan sa pagka-piniyalan ug pagkamapasalamaton, maghalad ang matag GKK sa ilang gitakda nga oras sa Santos nga Misa sa tibuok adlaw sa selebrasyon sa ika-11 ka tuig sa SOS sa Disyembre 5, 2021, adlawng Domingo.