12th Kapistahan sa OLMMP Indangan: Malampuson nga Gisaulog

Nobyembre 27, 2021, taliwala sa Pandemya Covid-19, wala nahimong babag sa mga parokyano sa Our Lady of Miraculous Medal Parish sa Indangan ang malinawon, malipayon ug mabungahon nga pagsaulog sa ika-12th ka tuig nga kapistahan sa maong Patron nga may temang Birhen Maria: Modelo sa Paglawig, Panaghiusa ug Gugma.

Sa maong bulawanong adlaw naay tulo ka misa ang gipahigayon: 6:00 am Mass, 9:am Mass ug 5pm Mass. Apan ang highlight niini mao ang Pontifical Mass sa alas nuwebe sa buntag nga gipanguluhan mismo sa atong halangdon nga Arsobispo sa Davao, Most Rev. Romulo G. Valles, D.D., uban ang OLMMP- kura paroko nga si Rev. Fr. Jesus Samaniego, ug niduyog usab sa maong selebrasyon si Most Rev. Abel Apigo, ang halangdon nga Obispo sa Archdiocese sa Mati.

Alas otso pa lang sa buntag, ubay-ubay na ang ang mga parokyano sa sulod sa simbahan alang sa Pontifical Mass. Dako kaayo nga garbo sa mga parokyano sa OLMMP tungod kay natuman gayud ang pagsaulog sa kapistahan sa bag-ong gitukod nga istruktura sa Simbahan. Sa homiliya, madasigon nga gitimbaya ni Archbishop Valles ang presensiya sa matag usa ug iyang gipadayag ang iyang pagdayeg sa buotan ug abtik nga kura paroko nga si Fr. Jess. Nalipay usab siya sa pakig-uban ni Bishop Apigo.

Sa pagpadayun sa homiliya, iyang gipasibaw ang dako nga pasalamat tungod sa pagtinabanagay ug pagsuporta sa katawhan sa kura paroko aron magmalampuson ang plano sa pagtukod sa simbahan. Iyang gihulagway ang kasing kasing sa matag usa nga nag-uros uros ug dili gayud kapugngan. Dugang pa ni Valles, dili masukod ang iyang kalipay tungod sa kanindot sa maong simbahan nga taliwala sa mga balita anaa sa kinahiladman ang pagpangga ug pagmahal sa simbahan nga maoy testamento sa pagtoo. Nagpaambit usab ang Arsobispo nga ang maong kapistahan mao ang end of the Church Year tungod sa sunod adlaw isaulog na usab ang New year sa simbahan nga mao ang Advent Season.

Ug iyang gibilinan ang nanimbahay sa usa ka pamalandong: Milawum ug miuswag ba ang pagtoo isip miyembro sa Simbahan? Ug gitapos sa Arsobispo ang iyang homiliya sa pagpaamgo sa mga parokyano diha sa pakig-uban ni Maria, ang Birhen Milagrosa, nga diha sa finale sa atong kinabuhi mao ang battle of good and evil, ang mahal na Birhen ang nakig-uban kanato sa paglawig ug sa kinatibuk-ang simbahan, ug isip usa ka Inahan, nga anaa sa tiil sa krus, siya mao ang nakipagkumbati ug nagbalibad sa tanang dautan. Siya ang atong magtatabang nga milagrosong inahan.

Nahinumduman nga duha ka semana una ang kapistahan adunay nahitabo nga Kumpirasyon ug Bloodletting isip preparasyon sa maong kapistahan. Dili usab magpaulahi ang atong abtik nga Youth Ministry nga maoy nagtagana sa programa sama sa poster making, creative facemasks, e-sports, quiz bee, tiktok competition, song cover competition, cosplay sa[LF1] Birhen Milagrosa, story telling, ug mobile legends. Aduna usab gipahigayon nga prusisyon niadtong Nobyembre 26, 4:30 am bisperas sa kapistahan.

Sa katapusan, mapasalamaton ang OLMMP sa mga benefactors, family sponsors ug donors alang sa kalampusan sa maong selebrasyon. Ug ang presensiya sa mga nagkandaiyang ministriya ug GSL sa matag GKK nga mao ang: Parish Pastoral Council, Formation team, Presynodal team, Legion of Mary, Gift Gatherer, Finance Committee, Divine Mercy Apostolate, Teofilo Fernandez Elem School, Teofilo Fernandez National High School, San Miguel Women’s Association, Acacia Elem.school, Acacia National high School, San Miguel Women’s Association, San Miguel Drivers’ Association. Ug ilabi na sa tanan, sa Kura paroko nga maoy nagahatag ug motibasyon ug inspirasyon sa matag usa. Dalaygon ug Himayaon ang Diyos sa maong kalampusan! (Marilou A. Luzon | SOCCOM – OLMMP)