Ika-4 Nga Kapistahan Sa Sona 8 Saulogon

Saulogon sa Sona 8 ang ika-4 nga Kapistahan sa Mahal nga Patrona, Immaculada Conception karong umaabot nga Disyembre 08, 2021. Ang Sona 8 nahisakop sa parokya sa St. Mary of the Perpetual Rosary Parish, Buhangin.

Unom ka katilingban ang sakop sa Sona 8 nga mao ang GKK San Isidro Labrador Juliville, GKK St. Joseph the Worker Jade Valley, GKK San Vicente Ferrer Uyanguren, GKK San Isidro Labrador Uyanguren, GKK Birhen sa Lourdes NCCC Relocation ug GKK San Vicente Ferrer Tinago. Gisugdan ang maong pagsaulog sa tinuig nga kapistahan niadtong 2018. Gihimo kini isip pahinungod sa Mahal na Birhen Maria ug pasalamat usab sa mga grasyang nadawat nianang tibuok tuig.

Ang tema niining tuiga mao ang: “Birhen Maria, sumbanan sa pagsunod sa kabubut-on sa Diyos ug pag-alagad sa kabus.” Adunay mga kalihukan nga pagabuhaton ang maong Sona usa na niini ang siyam ka adlaw nga pagnobena diin kini ipahigayon sa kapilya sa San Isidro Labrador Juliville sa alas 7:00 ang takna sa gabii. Magsugod ang nobena gikan sa Nobyembre 29 hangtud Disyembre 07, 2021. Tumong niini na mas palalumon ang kahibalo sa mga katawhan bahin sa kinabuhi ug mga hiyas sa Mahal na Birhen ug Inahan.

Aduna usab pagahimuon nga pagprusisyon sa Imahe sa Immaculada Conception sa bisperas o sa Disyembre 07, 2021. Kini iprusisyon palibot sa Sona. Ang pagsaulog sa fiesta mass pagahimuon sa Disyembre 08, 2021 sa alas singko ang takna sa kabuntagon ug ang GKK SIL Juliville mao ang host chapel sa maong misa.

Ang tema naghisgot sa pagkasinugtanon ni Santa Maria sa kabubut-on sa Ginoo. Kini usab nagsilbing inspirasyon ug pahinumdom sa matag usa kanato na ang kinahanglang magmando ug maghari sa atong kinabuhi mao ang Ginoo ug dili ang atong kaugalingon. Nagpasabot lamang kini na angay usab kitang mosalig sa iyahang ngalan ug plano.

Pag-alagad sa kabus maoy ikaduhang tumong na gitagaan ug importansya sa maong tema. Tungod sa kalisud niining pandemya, daghan sa mga kaigsoonan nato ang nag-antus ilabina na ang mga kabus. Si Maria maoy dangpanan sa katawhan sa panahon sa kahingawa maong kita unta usab mahimong mananabang niadtong mga naglisud natong igsuon. Ang pagkamapaubsanon ug pagkamatinabangon sa atong Inahang Maria maoy pipila sa mga maanindot nga hiyas na angay mabatonan ug maangkon sa tanan.

Daku ang pagsalig ug paglaum sa Sona 8 nga ang umaabot nga pagsaulog sa Solemnidad sa Immaculada Conception sa Mahal nga Birheng Maria mamahimong makahuluganon sa matag usa. Nanghinaot ang mga GKK Servant Leaders (GSLs) ug mga miyembro sa maong Sona nga dili lamang ang mga kalihukan ug plano ang mamahimong malampuson kundili pinaagi sa maong kapistahan adunay mga tawo nga matandog ug makaangkon usab sa mga hiyas sa mahal nga patrona, Immaculada Conception.

Viva Hesus! Viva Maria!

(Allyza Hope Tabigue, GKK SoCCom)