Si Kristo ang Matuod nga Kalipay

Ikatulong Domingo sa Adbiyento (December 12, 2021)
Zep 3:14-18A / Is 12:2-3, 4, 5-6 / Phil 4:4-7 / Lk 3:10-18

Ang Ikatulong Domingo sa Adbiyento gitawag kini ug Gaudete Sunday. Si San Pablo diha sa Ikaduhang pagbasa karon nag-imbita kanato nga nag-ingon “Paglipay kamo kanunay diha sa Ginoo. Subli-on ko pag-ingon: paglipay kamo!” Kinahanglan nga kitang mga magtutuo ug sumusunod ni Kristo magmalipayon sa kanunay. Kini usa ka imbitasyon nga naghulagway sa pag-abot sa Ginoo, sugaton ta Siya sa tumang kalipay.

Sa samang pagkaagi, ang mga tawo nangadto kang San Juan nangutana sila “Unsa man diay ang among buhaton? Kining maong pangutana dili lamang pangutana niadtong mga tawo nga nangadto kang San Juan apan kini usab pangutana natong tanan, kon usa ang atong buhaton aron kita makasulod sa Gingharian sa Langit nga mao ang gisaad sa atong Ginoo.

Kon atong pamalandungan pag-ayo ang kalipay nagsukad diha sa kamalinawon sa atong tagsa-tagsa ka kinabuhi o ang atong disposisyion sa atong kaugalingon. Ug kini nakagamot diha sa atong paghimamat sa pagkatawo ni Krsito. Hinaut niining Ikatulong Domingo sa Adbiyento kita sa kanunay magmalaumon ug magmalahutayon sa pagpaabot sa Ginoo nga puno sa kalipay diha sa atong kasingkasing ug sa tibook natong pagkinabuhi.

Dugang pa niana, ang atong Unang pagbasa si propeta Sofonias nag-awhag usab sa katawhan sa Israel nga magmalipayon sila “Singgit, O Israel! Pagmaya ug paglipay pag-ayo, O Jerusalem! Ang imbitasyon sa kalipay sa atong mga pagbasa karon dili lamang alang kanato apan kini usaka panagna nga ang tibook katawhan magmalipayon pag-ayo. Ang imbitasyon nga maglipay dili usaka mensahe nga makapahisalaag o usaka walay kaayohan, apan sa laing bahin, kini usaka makaluwas nga tagna, usa ka hangyo nga maluwas og kini magsugod diha sa pagbag-o sa sulod sa atong tagsa-tagsa ka mga kasingkasing.

Sa katapusan, atong hinumduman ang unang pag-anhi ni Kristo siya nagmapaubsanon aron mabag-o ang kalibutan, gipili niya nga magpakatawo ngadto sa usa ka mapaubsanon nga babaye nga si Santa Maria nga taga-Nazaret. Atong mahinumdoman ang pagtimbaya sa Angel ngadto kaniya, “Maghimaya ka, puno sa grasya, ang Ginoo anaa kanimo”. Niining mga pulong anaa ang sekreto sa usaka tinood nga Pasko. Kini gisubli sa Diyos ngadto sa Simbahan, ug nganha kanato nga mga magtutuo. Paglipay, ang Ginoo haduol na! kining maong disposisyon ni Santa Maria hinaut nga mao usab ang anaa sa atong kaugalingon uban ang pagpaubos ug kaisog aron ang kalibutan ug kita makadawat kang Kristo, nga mao ang tinubdan sa tinuod nga kalipay. (Bro. Soren Abellanosa)