Malungtaron nga Debosyon kang San Jose Ilusad

Giisip nga makahuluganon gayud ang giandam nga mga kalihukan alang sa pagtak-op sa Tuig ni San Jose karong Disyembre 8, 2021 sanglit kasaulogan usab kini sa Solemnidad sa Imakulada Konsepsyon ni Bulahang Birhen Maria, kinsa nagpanaw sama sa mga katawhan karon nga nagapanaw alang sa pagpangandam sa Synod of Bishops sa tuig 2023 ug atol sa panaw sa katawhang Pilipino kinsa gigasahan sa Misyon sa pangsangyaw sa Maayong Balita ning ika-500 ka tuig nga Kristyanismo.

Gawas sa gitakdang National consecration of families to St. Joseph sa Disyembre 8, adlawng Miyerkules, ilusad usab sa tibuok nasud ang Men of Saint Joseph, ang kapunungan sa mga deboto kang San Jose.

Dinhi sa Arkidayosis sa Dabaw, gibutyag ni Arsobispo Romulo G. Valles, D.D., pagahimoon sa alas-6:30 sa buntag ang Santos nga Misa isip pormal nga pagtak-op sa Tuig ni San Jose, ang konsagrasyon sa mga pamilya ngadto kaniya, ug ang pormal nga paglusad sa Confraternity of Saint Joseph sa Saint Joseph the Worker Parish, Sasa.

Sayo niining tuiga, sa bulan sa Abril, gisugdan sa Saint Joseph the Worker, Sasa ang 33 days of Prayer and Reflection in Preparation for the Consecration to St. Joseph, ug gipadayon kini hangtod sa ika-7 nga batch nga molungtad ngadto sa National Consecration of Families to Saint Joseph sa Disyembre 8,2021.

Matud ni Rev. Fr. Leonardo Dublan, Jr., kura paroko sa St. Joseph the Worker sa Sasa, gilauman nga ang tanan nga mga nakatambong sa 33 Days motambong kauban ang ilang pamilya alang sa National Consecration ug pormal nga paglusad sa Confraternity of Saint Joseph, sa Disyembre 8, alas-6:30 sa buntag. Gikan Dis. 4-7 , pagahimoon sa parokya sa Sasa ang Reflection isip pagpangandam alang sa konsagrasyon ngadto kang San Jose nga i-livestream sa Davao Catholic Herald Facebook page ug isibya sa DXGN 89.9 Spirit FM, inigkahuman sa pag-ampo sa Santos nga Rosaryo (8:00 pm).

Alang kang Arsobispo Valles, “ usa kini ka linugdangan nga maka form og devotees led by men (tatay, papa, amahan sama ni St. Joseph) ug i-presentar sila isip MEN of Saint Joseph,” ug gilauman nga himoon usab kini sa tanang mga dayosesis, dili lamang sa nasud Pilipinas apan sa tibuok kalibutan.

Niadtong Disyembre 8, 2020, gideklara ni Papa Francisco ang tuig ni San Jose isip pagpasidungog sa ika-150 ka tuig nga deklarasyon nga Patron of the Universal Church.

“Di na ni bag-o ; sama sa Adoracion Nocturna; women Devotees to St. Joseph; ang bag-o lang duso sa mao rang style alang sa mga lalaki, especially sa giingon sa , Santo Papa, hilom, underrated sa mga life lessons sa mga tatay, mga papa, ni Saint Joseph. Posible nga mo-carry on … molungtad sa katuigan,” si Arsobispo Valles nagkanayon.

Sa pagkakaron, si Fr. Dublan namahayag nga ang unang gi-organize nga Confraternity of St. Joseph sa ilang parokya mikabat na sa 375 ka mga sakop sa mga kalalaken-an, kababayen-an ug kabatan-onan nga gikatag sa walo ka mga dapit ubos sa parokya sa St. Joseph the Worker, Sasa.

Gilauman usab niya nga mosunod usab ang uban pang mga parokya ilabi na ang mga GKK kansang patron mao si San Jose. Nasayran nga nagsugod na usab ang mga parokya sa San Pedro Cathedral ug Sta. Ana Shrine sa pag-organize sa ilang Men of Saint Joseph.

“We will be happy to be invited to organize a confraternity and men of st. Joseph sa ubang mga parokya, “ si Fr. Dublan nagkanayon. Iyang gibutyag nga pinaagi sa pagmugna sa maong debosyon sa tibuok arkidayosis, ma-establisar na ang mga deboto ug matuman na ang misyon sa parokya nga mamahimong usa ka Shrine ang St. Joseph the Worker Parish sa Sasa.

“Ang importante mao nga ilhon ang mga hiyas ni San Jose, mapalawon ang pakigsoud sa Ginoo, ilabo na sa pamilyado, makatabang sa ilang pamilya,” si Fr. Dublan midugang, “busa, hasta ang mga talks kanunay nga nasumpay ngadto sa pamilya linked to family; ngano naa na ang iyang maong hiyas nga masinati sa gipahigayon nga 33 days.”

Sa iyang kabahin, nailhan na pag-ayo ni Fr. Dublan si San Jose nga maoy Protector of the church ug nasundan ang hiyas sa gitawag nga prudence kon maayo nga paghukom sa mahinungdanon nga mga butang , “ilabi na sa mga kura paroko, usahay reactive ta sa atong mga lihok ug sa mga desisyon, kinahanglan usab ang pasensiya ilabi na kung daghan kaayo ug mga ginabuhat.”

Giplanuhan nga ipadayon sa parokya sa St. Joseph the Worker ang 33 days nga seasonal sama sa Marso 9 – Solemnidad ni San Jose, Bana ni Maria; Mayo 1- kapistahan ni St. Joseph the Worker ug ingon man sa Solemnidad sa Imakdulada Konsepsyon sa Disyembre 8, ang adlaw sa pagdeklara usab kang San Jose isip Patron sa Universal Church.

Sa gipagula nga mga giya sa mga buluhaton sa mga deboto ni San Jose gikan sa Order of Saint Jose sa Pilipinas, naglangkob kini sa makanunayong pag-ampo, pagka-masinugtanon, tig-amuma ug tigpanalipod sa pamilya,- pipila ka mga hiyas nga ilhon ug sundon sa mga Men of Saint Joseph.

Gipasabot ni Arsobispo Valles nga possible nga dili siya makita sa National Consecration sa alas-11 sa buntag nga pagapanguluhan sa bag-ong pangulo sa Catholic Bishops Conference of the Philippines nga si Bishop Pablo David nga pagahimoon sa Cathedral, Kalookan ug pagasundan sa usa ka Misa, sanglit gitakdang magsaulog siya sa kapistahan sa Imakulada Konsepsyon sa Penaplata sa IGACOS sa alas-10:30 sa buntag. Gitakda usab siya nga mangulo sa Santos nga Misa alang sa kapistahan sa Imakulada Konsepsyon sa Mintal sa alas-5 sa hapon sa Disyembre 8, 2021.

Malipayong nahisgutan usab ni Arsobispo Valles atol sa iyang programa nga Tingog sa Magbalantay sa DXGN 89.9 Spirit FM, alas-6:30 sa buntag, Disyembre 5, 2021, ang pagdeklara isip special working holiday sa Sept. 8, adlawng natawhan ni Bulahang Birhen Maria ug Dis. 8, isip non-working holiday ni Pres. Rodrigo Duterte ug holyday of obligation sa mga Katoliko, “buot ipasabot, mosimba kita.”

Gitakdang sugdan na mga alas-7 sa buntag ang ikaduhang Spiritual Pilgrimage ride gikan sa St. Joseph the Worker Parish, Sasa padulong sa Mary Mediatrix of Grace Cathedral sa Dayosis sa Digos ug dayon molusad paingon sa St. Joseph Parish sa Sta. Cruz, Digos alang sa usa ka Santos nga Misa nga pagapanguluhani Digos Bishop Most Rev. Guillermo V. Afable, D.D. inubanan sa Sons of Saint Joseph sa maong parokya ug pagsulod sa Holy Door. Gipahinumduman ni Fr. Dublan ang mga moapil sa maong pilgrimage ride sa pagpangandam sa kaugalingon alang sa pag-angkon sa indulhensiya sa Year of St. Joseph ug sa Holy Door alang sa 500 years of Christianity.